, piątek 19 sierpnia 2022
CO TYDZIYŃ PO NASZYMU: Sie zmiznył
We wielkim kszefcie, dycki cosi zbytecznego kupiymy fot: JFD



Dodaj do Facebook

CO TYDZIYŃ PO NASZYMU: Sie zmiznył

JFD
Szpacyrkym po Cieszynie
“Gdo sie za swój jynzyk wstydzi takim nich sie każdy brzidzi”

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie tóm biołóm szczałke w tej czyrwiónej kostce, kieróm nóńdziecie pod spodkym”.

Sie zmiznył

Telkowne roki żodnymu nie zawadzoł tyn kszeft na Regera w kierym przedowane były rozmajte garce i chymikalija, aż tu na roz wziył i sie zmiznył. I nie wiym czy to je przez te drożyzne, czy skyrs czegosi inszego, ale na zicher bydzie go brakowało tustelokóm. Szło tam dycki u nich dostać rozmajte wieca, kiere były poryncznie poukłodane na regałach, a przi tym szło też zaros sie czegosi wywiedzieć łod ekszpedyjyntki wiela każdo wiec kosztuje i czy je łóna tela wort. Taki małe kszefty majóm to do siebie, że jak człowiek do niego wlezie, to zarozinko wszecko widzi i nie traci czasu na zbyteczne szmatłani sie i ani na stoci w raji ku kasie. Taki mómy dzisio czasy, że wielki kszefty poradzóm ludzióm wszelijaki wieca ukozać w kupie i skyrs tego ludzie majóm w swojich czepóniach wielki misz masz. Kiejsi wszecki kszefty były mjynsze, ale w każdym były taki wieca, po kiere każdy szeł i wiedziół, że yno tam poradzi ich dostać. Dzisio je wszecko w kupie i taki dejmy na to chlyb, wórszt, jelitka, leberka, trześnie, rybiźle, sałot, łowiynzina, krepliki i insze wieca do jedzynio, leżóm wedla garców, szrubek, żelozek i aji inszej rozmajtej oblyczki. Skyrs tego ludzie coroz wiyncyj zustawiajóm piniyndzy w tych wielkich kszeftach, bo dycki cosi łacniejszego uwidzóm i uż roz dwa majóm to wciepane do swojigo kosza. Jako to funguje, że jakosi ni ma im na to żol piniyndzy, tego nie wiym, ale możne to je skyrs tego, że moc tusteloków płaci yno plastikym, abo telefónym. Dziepro nikiedy isto dóma sie kapnóm jak zozdrzóm do kómputra, o wiela majóm mjynij piniyndzy na kóncie, ale to uż je dycki za nieskoro.

Mini słownik gwary cieszyńskiej:

telkowne - liczne, zawadzoł - przeszkadzał, kszeft - sklep, sie zmiznył - zniknął, skyrs - z powodu, na zicher - na prawdę, dycki - zawsze, wieca - rzeczy, poryncznie - praktycznie, wiela - ile, tela wort - tyle warte, szmatłani sie - plątanie się, w raji - w kolejce, poradzóm - potrafią, w kupie - razem, czepóń - głowa, ich dostać - ich otrzymać, wórszt - kiełbasa, jelitka - kaszanka, leberka - pasztetówka, trześnie - czereśnie, rybiźle - porzeczki, łowiynzina - wołowina, krepliki - pączki, wedla - obok, żelozko - żelazko, oblyczka - ubiory, łacne - tanie, uwidzóm - zobaczą, wciepane - wrzucone, nikiedy - czasami, sie kapnóm - się zorientują, jak zozdrzóm - jak zajrzą

Tóż miyjcie sie wszedcy dobrze i wiesiołego popióntku

Komentarze: (0)    Zobacz opinię czytelników (0)    Dodaj opinie
Redakcja nie ponosi odpowiedzialności za treść komentarzy pozostawionych przez internautów. Komentarz dodany przez zarejestrowanego użytkownika pojawi się na stronie natychmiast po dodaniu. Anonimowy komentarz zostanie opublikowany z opóźnieniem, po jego akceptacji przez redakcję. Komentarze niezgodne z regulaminem będą usuwane.

Dodaj komentarz

Zawartość pola nie będzie udostępniana publicznie.
  • Adresy internetowe są automatycznie zamieniane w odnośniki, które można kliknąć.
  • Dozwolone znaczniki HTML: <em> <strong> <cite> <code> <ul> <ol> <li> <dl> <dt> <dd>
  • Znaki końca linii i akapitu dodawane są automatycznie.

Więcej informacji na temat formatowania

Image CAPTCHA
Wpisz znaki widoczne na obrazku.
reklama
reklama