Szpacyrkym po Cieszynie“Gdo sie za swój jynzyk wstydzi takim nich sie każdy brzidzi”
"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"
POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie tóm biołóm szczałke w tej czyrwiónej kostce, kieróm nóńdziecie pod spodkym”.
Barewny puc
Nie wiym gdo dwacet roków tymu to wyszpekulyrowoł, coby tustelocy zaczli sie kamracić s familijami kiere miyszkajóm w Pucku, ale na zicher musioł isto mieć swój samolot, abo swojigo szofera. Dzisio, jak wszecko je taki drogi, to chocioż ty wielki fotki, kierymi obwieszóny je cały płot łod Parku Pokoju, ukazujóm nóm jako je w tym Pucku pieknie. Dożylimy sie takich czasów, że zaś jak kiejsi to bywało, bydymy mógli se rajzować yno s palcym po mapie, bo na bynzinem chybio nóm uż piniyndzy. Tak se myślym, że dwacet roków tymu też ta rajza do Pucka była drogo, ale szło ku lepszymu i wszedcy se isto wszymali, że za chwilem pudzie naburzić bynziny za porem groszy pod szpuńt do naszego baku i nawszczywić kamratów w Pucku. Tak sie jednakowóż nie stało i dzisio yno ci ważniejsi rotuzowi roz za kiedy tam do nich zajadóm, coby se może zamoczać szłapy w morzu i porem godzim powydychać jodym. Nie wiym yno czy styknie chocioż placu tam na tej jejich plaży dlo naszych tusteloków, bo łóna je tam tako maluśko, że mogóm sie zadeptać. Dzisio jak je wszecko tak strasznie drogi, to łóni możne, że też nigdzi nie pojadóm i wysmyczóm ze swojich szopek stare celty i inksze plażowe wieca, coby zaszporować na rajzie do Cieszyna. I tak jak u nas, zustanóm im yno fotki s Cieszyna, kierymi ustrojóm se jakisi pucki płot, coby roz za kiedy podziwać sie na fotki s naszego pieknego miasta, na kierych możne uwidzóm rotuz bez szpica i zar-zowiałóm studnie Trzóch Braci. A możne, że tego roku jakisi macher zrobi dlo nich fotki s hałdamaszu Trzóch Braci, na kierych wyfotografiruje yno ty chałupy, kiere majóm nowy barewny puc.
Mini słownik gwary cieszyńskiej:
dwacet - dwadzieścia, wyszpekulyrowoł - wymyślił, sie kamracić - przyjaźnić się, na zicher - na pewno, kiejsi - kiedyś, rajzować - podróżować, chybio - brakuje, rajza - podróż, se isto wszymali -sobie pewnie myśleli, naburzić - napełnić, szpuńt - korek, nawszczywić - odwiedzić, roz za kiedy - czasami, szłapy - stopy, wysmyczóm - wydobędą, szopka - komórka, celty - namioty, wieca - rzeczy, zaszporować - zaoszczędzić, ustrojóm - przyozdobią, uwidzóm - zobaczą, zar-zowiałóm - zardzewiałą, hałdamasz - zabawa, barewny puc - kolorowy tynk.
Tóż miyjcie sie wszedcy dobrze i wiesiołego popióntku
Dodaj komentarz