“Gdo sie za swój jynzyk wstydzi takim nich sie każdy brzidzi”
"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"
POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie tóm biołóm szczałke w tej czyrwiónej kostce, kieróm nóńdziecie pod spodkym”.
Nowy puc
Rychlij czy nieskorzij, ale każdo chałupa abo inszo postawióno wiec, kiejsi sie zestarnie i trzeja jóm obalić, abo dać ji nowy puc. Snoci dzisio dopadło to też te naszóm “Ślónzoczke”, kiero uż dłógi roki stoji przed zómkym. Kierysi prziszeł na to coby dać ji kapke nowego gzychtu, bo sie zestarnyła i trzeja ji zrobić renowacyje. Rozchodzi sie ło to, że nejbardziyj podobnież zestarły sie ty schódki, po kierych ku ni roz zokiedy, rozmajci ważni tustelocy, noszóm wińce i kwiotka. Przedstowcie se, coby to było jakby sie tam taki jedyn ważny tustelok zakopnył i nie dej boże, eszcze przi tym kopyrtnył. To, co jednakowóż idzie tam uwidzieć, to sóm eszcze insze wieca, kiere zustały odlkupane łod tego hroznego betóna i wyglóndo na to, że za jakisi czas zrobióne zustanóm nowe, abo ty odrażóne jakosi inakszyj wyporzóndzóne. Skónd i łod kogo wziyły sie na to pinióndze, to ni ma żodno tajymnica, bo idzie sie tego wywiedzieć w rotuzie, ale rozchodzi sie ło to, czy dejmy na to taki “Floryjan”, kiery stoji na rynku nie powiniyn być piyrszy na raji. Na zicher eszcze by sie takich bardziyj odrzitych wiecy s kamiynio w naszym mieście naszło, kiere należałoby zarozinko łopucować, ale isto ta paniczka, kiero “Ślónzaczkóm” sie mianuje ciepała sie fest kómusi na łoczy. Na łoczy ciepie sie też ta bania na rotuzie s kierej przeszło uż dwa roki tymu wiater zduchnył tyn zieleźny szpic razym s fankóm i do dzisia nie szło nóńs żodnego fachmana, coby to zrychtowoł.
Mini słownik gwary cieszyńskiej:
rychlij - szybciej, nieskorzuj - później, obalić - zburzyć, puc - tynk, snoci - podobno, prziszeł na to - wpadł na to, kapke - trochę, gzychtu - wyglądu, roz zokiedy - czasami, wińce - wieńce, przedstowcie se - wyobraźcie sobie, kopyrtnył - przewrócił się, wieca - rzeczy, odklupane - odpukane, hrozny - duży, odrażóne - odmontowane, dejmy na to - czy naprawdę, na raji - w kolejności, na zicher - na prawdę, odrzitych - obdartych, łopucować - wyczyścić, sie mianuje - nazywa się, ciepała - rzucała, fest - mocno, zduchnył - zdmuchnął, zieleźny - żelazny, fanka - chorągiewka, nónś - znaleźć, zrychtowoł - naprawił.
Tóż mjyjcie sie wszedcy dobrze i wiesiołego popióntku
Redakcja nie ponosi odpowiedzialności za treść komentarzy pozostawionych przez internautów. Komentarz dodany przez zarejestrowanego użytkownika pojawi się na stronie natychmiast po dodaniu. Anonimowy komentarz zostanie opublikowany z opóźnieniem, po jego akceptacji przez redakcję. Komentarze niezgodne z regulaminem będą usuwane.
Dodaj komentarz