“Gdo sie za swój jynzyk wstydzi takim nich sie każdy brzidzi”
"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"
POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie tóm biołóm szczałke w tej czyrwiónej kostce, kieróm nóńdziecie pod spodkym”.
Czorne klawiyry
Uż wszedcy cosi napisali ło tym czornym klawiyrze, kiery rotuzowi postawili na rynku i dzisio na mie też prziszła raja. To, że go roz dwa obalili na pleca jacysi młodziocy, isto uż wszecy wiedzóm. ale to, że podobnież, to dziwo je piyrsze na świecie to mało gdo ło tym wjy. I możne isto też by sie tego żodyn nie dowiedzioł jakby na nim kierysi tego nie napisoł. Ludzie jednakowoż prawióm, że ganc taki same trzi czorne klawiyry stojóm w Katowicach. I możne skyrs tego, kierysi odlepił, abo zeszkroboł tych piyrszych piyńć liter s tego naszego klawiyra, coby to nie nasrowało tusteloków. I teraz nie wiym jako to trzeja czytać, bo litery: “SZY NA ŚWIECIE...” do niczego nie idzie przirazić. Nejlepszyj by było kapke tej chwolby ukrócić i napisać raczyj prowde, że to je sztworty taki klawiyr w Polsce, a s tym światym dać se pokuj, bo na iste tego żodyn dobrze nie wiy. Nie prziszełech też na to, skyrs czymu rotuzowi do dzisia nie postawili nad nim jakisi strzechy, bo latówóm poróm jak słónko przigrzeje tyn klawiyr to łón zrobi sie wrzawy, do kupy s tym zicym kiere wedla niego stoji. Przeca wszedcy wiedzóm, że czorno barwa na słóńcu robi sie dycki wrzawo i tym tuplym ło graniu na nim żodnymu sie, ani nie spómni. Tak samo bydzie jak sie czasami zamroczy i cosi s nieba gichnie, to o graniu na klawiyrze trzeje bydzie zapómnieć. Nejlepszyj by było, coby tam przi nim prziszrubować do ziymi taki rozkłodany wielki plażowy paryzol i byłoby po kłopocie. Ale nejlepszy bydzie taki napad, coby go postawić pod laubami, kiere bydóm go chrónić przed każdym złym czasym, kierego u nas nigdy nie chybio.
Mini słownik gwary cieszyńskiej:
klawiyr - fortepian, i dzisio - i teraz, prawióm - mówią, ganc - całkiem, na polu - na dworze, skyrs - z powodu, zeszkroboł - zdrapał, nie nasrowało - nie denerwowało, przirazić - przyczepić, kapke - trochę, chwolba - chwalenie się, wrzawy - gorący, zico - siedzenie, dycki - zawsze, tym tupluym - tym bardziej, nie spómni - nie przypomni, zamroczy - zachmurzy, gichnie - poleje się, prziszrubować - przykręcić, napad - pomysł, lauby - podcienie, zły czas - zła pogoda, chybio - brakuje.
Tóż mjyjcie sie wszedcy dobrze i wiesiołego popióntku
Redakcja nie ponosi odpowiedzialności za treść komentarzy pozostawionych przez internautów. Komentarz dodany przez zarejestrowanego użytkownika pojawi się na stronie natychmiast po dodaniu. Anonimowy komentarz zostanie opublikowany z opóźnieniem, po jego akceptacji przez redakcję. Komentarze niezgodne z regulaminem będą usuwane.
Dodaj komentarz