Kuchyń obsztelować

Miało tego być coroz mjynij, ale jakosi tego nie widać, bo nikierym je mało wywiesić jedno chwolidło i poradzóm na kupie dać aże trzi. A wypisowane sóm na tych chwolidłach taki rozmajte gupoty, że nie idzie sie moc razy ani skapować ło sie rozchodzi. Dejmy na to, taki wielki zrobióne s plechu trzi na kupie chwolodła, prawióm nóm ło tym, że jakisi Góra robi kuchynie dlo króla. Królów uż downo w Polsce ni ma, a tym tuplym aji w Cieszynie, ale kómusi sie to poskłodało do rymu i tak to napisoł. Jo by mu poradził coby raczyj napisł to kapke po naszymu, to aji Czesi prziszli by na to, ło co sie rozchodzi. Fajnie by sie to cosi takigo czytało, jakby to było napisane dejmy na to tak : “ Robiym kuchynie, kiere se możecie obsztelować yno w Cieszynie” i uż każdy by wiedzioł kaj s pinióndzami mo prziś. Ty chwolidła sóm tak wielki, że jak kierysi cudzy żynie autym po ulice Liburni, to na zicher bydzie mioł zarozinko we swoji czepóni to, że ci króle kierzy eszcze w Europie egzystujóm bydóm musieć nawszczywić nasz Cieszyn i kuchyń se tu obsztelować. A jak sie ta rzecz eszcze po świecie rozyndzie, to gdo wiy, że możne aji cysorz s Japóniji przijedzie za takóm kuchynióm do Cieszyna. Wszecko je przeca dzisio na świecie możne, bo siednóć do swojigo europlanu każdy król może roz dwa i uż bydzie Cieszynie. Kiejsi Franciszek Jozef, aż sztyry razy nawszczywił nasze miasto chocioż na zicher u siebie dóma we Wiydniu mioł stolorza, kiery mu meble do kuchynie isto zrobił. Coby eszcze tych chwolideł było mało, to tyn pón Góra kiery ty kuchynie robi, dorzóndził sie isto s kimsi takim, co paniczkóm poprawio figury i ty łoba słowa- figura i Góra sie srymowały. I podziwejcie sie, jako to nikiedy mało trzeja, coby ludzióm zamiyszać w czepóniach.

Mini słownik gwary cieszyńskiej:

nikierym - niektórym, chwolidło - reklama, skapować sie - zrozumieć, plech - blacha, prawióm ło tym - mówią o tym, kuchynie - kuchnie, tym tuplym - tym bardziej kapke - trochę, obsztelować - zamówić, cudzy - obcy, żynie - gna, na zicher - na pewno, zarozinko - szybko, nawszczywić - odwiedzić, ta rzecz - ta wiadomość, europlan - samolot, sztyry - cztery, dorzóndził sie - porozumiał się, isto - prawdopodobnie, paniczki - kobiety, czepóń - głowa, podziwejcie sie - popatrzcie się.

Tóż mjyjcie sie wszedcy dobrze i wiesiołego popióntku