CO TYDZIYŃ PO NASZYMU: Odrzito s pucu ściana

”...kszeft s babskimi szatami...”. fot. FJD

"...dalij trefiymy na masorza...”. fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

Spolóny kocur

Dzisio przeciepnymy sie na drugóm stróne miasta i obezdrzymy ulicem co Przikopóm jóm zmianowano. Zaroz za skryntym ze Zamkowej uwidzicie odrzitóm s pucu ściane a ku tymu poszkryfanóm na wszeli jaki mustry. Tyn winkiel s tóm ścianóm je tak blisko granicy, że wszecki Pepiki, kiere do nas przichodzón na “nakup” muszóm to obezdrzić, coby zaroz wiedzieli u kogo sie naszli. Żodnego za to nima gańba i eszcze w łoknach wywiesili jakisi kartki na kierych pisze,że chcóm piyrsze pjyntro kómusi przedać możne, że na jakisi kszeft, abo na kwartyr. Kapke dalij na tej łodrzitej ścianie kierysi wywiesił taki małe chwolidło z kierego idzie sie dowiedzieć, że rozmajte kocury, psy a możne i insze zwiyrze kiere mo kudły może se u nich zrobić waserwele, abo może aji ty kudły zafarbić. Zaroz wedla idzie trefić na kszeft s babskimi szatami, galatami i inszymi rozmajtymi jaklami, kiere mało gdo kupuje, bo za pół godziny coch wedla nich stoł, żodyn tam do postrzodka nie wlozowoł. Zaroz dalij trefiymy na masorza do kierego wlazuje sie przez siyń w kierej sóm też dwiyrze do tej postympowej partyji co po naszymu by sie mianowała jako spolóny kocur, chocioż uż pore miesiyncy tymu przechrzcili jóm na Twój Ruch. Nejsrandowniejsze je jednakowóż to, że kiejsi tyn panoczek co te partyje założył prziniós do telewizyje czepanie babucia i isto tymu dzisio pasuje mieć im swojóm kancnaryje wedla masorza, bo możne zaś jakisi kónsek babucia bydóm kiejsi potrzebować

Mini słownik:

czytadło - prasa,

przeciepnymy - przerzucimy,

obezdrzymy - oglądniemy,

zmianowano - nazwano,

odrzity - obdarty,

kszeft - interes,

kwartyr - mieszkanie,

waserwele - trwała wodna,

szaty - sukienka,

jakla - kurtka,

masorz - rzeźnik,

dwiyrze - drzwi,

babuć - wieprzek,

nejsrandowniejsze - najśmieszniejsze.

Mjyjcie sie wszedcy dobrze i wiesiołego popióntku.

Dzisiejszy tekst ma tytuł "Spolóny kocur".