CO TYDZIYŃ PO NASZYMU: Kaj sie yno do wiszóm ty chwolidła, aji na tankszteli

"...,że je szykownym chłapcym...". fot. FJD

"...że jakisi miynso B/K kosatuje tela a tela..". fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydze rozumioł
to jyny wiater bydzie po naszymu szumioł"

Świycónce chwolidło

Zaroz za tóm tanksztelóm kiero soji na winklu Katowicki i Filasiewicza bydymy sie oglóndać kaj i o czym idzie cosi fajnego napisać po naszymu. Nie lza przynś kole ni coby nie uwidzieć na takim wielkim chwolidle wyszczyżónego A. Małysza. To chwolidło je tak wielki, że jak nie podźwignymy łoczy do góry to sie nie zmiarkujymy czyja ta tanksztela tak naprowde je. Trzeja mu to niechać, że je szykownym chłapcym i możne tymu kaj sie jyno do wieszany je na chwolidłach. Nima mu co zowiścić bo chłop sie na to moc narobił i teraz lekóm rynkóm na tych swojich fotografijach isto dzisio piekne pinióndze zarobio. Starszy od niego kolega ło prawie piyńć roków taki jedyn japóniec do dzisia hópko na skoczniach całego świata, bo tam w tym kraju kaj sie łón rodził ludzie robióm aż do śmierci to czego sie wyuczyli. Nasz Adam nejprzód sie wyłuczył szpacyrować po dachach i isto tymu lekczyj mu prziszło dropać sie na najazdy wszeckich skoczni świata i tak jak na tych dachach dziwać sie s wysoka na ludzi. Aż dziw biere, że tak prziwykniynty człowiek do dziwanio sie s wysoka na świat poradzi dzisio siedzieć za wolantym i łoglóndać piosek dookółka siebie. Zaś na prociw tej tankszteli idzie kupić wszelijaki jedzyni, kiere Cieszyniocy se moc chwolóm. Ludzie majóm też takóm wygode, bo nie potrzebujóm wlazować do postrzodka coby sie wywiedzieć wiela co tego dnia kosztuje, bo to jejich świycónce chwolidło pokazuje fórt cosi nowego. Idzie sie wywjedzieć dejmy na to aji tego, że jakisi mjynso B/K kosztuje tela a tela a przi tym aji tego jakóm ciepłote mómy w tym padzie na polu. Je to dobre dlo tych cieszynioków co rychtujóm sie do wydropanio na tóm liburniowóm Golgote s taszkami pełnymi toworu.

Mini słownik:

tanksztela - stacja benzynowa,

winkiel - róg,

nie lza - nie można,

chwolidło - reklama,

wyszczyżóny - uśmiechnięty,

szykowny - przystojny,

hópko - skacze,

dziwać sie - patrzeć się,

wolant - kierownica,

wlazować - wchodzić,

fórt - ciągle,

taszka - torba.

Mjyjcie sie wszedcy dobrze i wiesiołego popióntku.

Wychodząc na przeciw czytelnikom/internautom - miłośnikom naszej gwary w dzisiejszym i w następnych odcinkach “Co tydziyń po naszymu” będziemy łączyli tekst pisany ze słowną interpretacją. Będzie to ciekawe przeżycie dla tych internautów, którzy nie znają dobrze naszej gwary i mówione słowa przekażą im specyfikę ich używania/wymawiania, szczególnie jeżeli chodzi o akcent i nosówki. Dzisiejszy tekst ma tytuł "Świycónce chwolidło".