CO TYDZIYŃ PO NASZYMU: Autowe SPA

"...zmianowali to takim autowym SPA". fot. FJD

”...idzie załatwić rozmajte kwartyrowe sprawy...". fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydze rozumioł
to jyny wiater bydzie po naszymu szumioł"

Ancugi dlo chłopów

Sie mi zdo, że isto każdego s was uż to w życiu chytło, że czasym to co se pomyślicie abo s kimsi ło tym porzóndzicie roz dwa sie stanie. Mie sie to przidarziło zeszły tydziyń boch napisół, że ty dochtory kiere yno po połedniu chcóm was lyczyć i tak was pośłom do szpitola. Nie wiym czy to moji pisani nasz minister łod zdrowio poczytoł, ale tego dnia uż w jednej gazecie napisałi, że łón mo taki napad coby im to zakozać. I tak teraz rozmyślóm co dzisio napisać coby zaś jakisi inszy minister se to wziył do serca i wartko ludzióm w czymsi ulżył. Na tej ulicy Filasiewicza na kierej dzisio my sóm nima nic takigo coby tym padym szło tak wartko sprawić. Kapke dalij za tymi dochtorami i za tymi komputrami trefiymy na małom parterowóm chałupke w kierej idzie załatwić rozmajte kwartyrowe sprawy a ze zadku w poru izbach szwoczki szyjóm piżamy. Widać s tego, że uż po kapce poradzymy sie łod tych chinczyków strzepnóć i cosi sami poradzymy uszyć. Możne, że jak nabieróm wprawy to za jakisi czas bydóm aji szyć ancugi dlo chłopów abo szaty i spodki dlo paniczek. Zaś s drugi stróny cesty je jedyn s nejstarszych autowych warsztatów w naszym Cieszynie. Je to do podziwu, że łóni sie obsoli i uż przeszło pindziesiónt roków sprawujóm auta cieszyniokóm. Zoleży to jak widać yno łod ludzi, kierzi poradzóm o swoji dbać i nie dali sie zawrzić ani przedać. Pieknie wszecki ściany opucowali a dwiyrze na modro posztrajchowli i dzisio widać ich uż s daleka. Majóm też taki fajny napad coby napisać jako to bydóm wasze auto opatrować jak go tam do nich prziwieziecie i zmianowali to takim Autowym SPA. Czy to je prowda tego nie wiym, ale sprugować możne że worce.

Mini słownik:

chytło - złapało,

porzóndzicie - porozmawiacie,

napad - pomysł,

kwartyrowe - mieszkaniowe,

szwoczka - krawcowa,

po kapce - po trosze,

ancug - ubranie,

szaty - sukienki,

spodki - spódnice,

sie obstoli - utrzymali się,

opucowali - otynkowali,

posztrajchowali - pomalowali

Mjyjcie sie wszedcy dobrze a przi tych Świyntach życzym Wóm twardego wajca i mokrej wody s ampra.

Dzisiejszy tekst ma tytuł "Ancugi dlo chłopów".