“Gdo sie za swój jynzyk wstydzi takim nich sie każdy brzidzi”
"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"
POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie tóm biołóm szczałke w tej czyrwiónej kostce, kieróm nóńdziecie pod spodkym”.
Wszecki wieca
Dycki to je tak, że jak sie kansi do cudzego miasta zajedzie, to chciało by sie podziwać na taki wieca, kierych ni mómy sie u siebie. Skyrs tego też mało gdo góni po kszeftach, bo dożylimy sie takich czasów, że wszyndzi je to samo i szkoda na to mitrynżyć czasu. Piszym to dzisio też skyrs tego, że jakosi nie widać, coby w naszym mieście naprowde mioł gdo we starości ty wszecki wieca kierych ni majóm insze miasta. Dejmy na to, ty drzewiane kostki, kierymi wyłożóno je cesta na naszym zómku, godzóm sie yno na spolyni, bo uż wiela ducha w nich ni ma. To ni ma wszecko, bo nikierych kostekek uż tam chybio i jo se wszymóm, że sie kómusi na cosi przidały. Możne, że aji uż zustały wciepane pod bache i zgorały, abo podstyrczóne zustały za rozrażóne nogi u jakigosi sztokerlika. Ni ma se s tego robić raczyj żodnych błoznów, bo dziepro, jak jakisi letnikorz rozrazi se tam swoji klepeto, to dziepro rotuzowym nie bydzie do śmiychu. Możne, że je to jakosi cieszyńsko choroba, bo przi Studni Trzóch Braci mómy ganc takóm samóm dziurawóm ceste i aże dziw biere, że do dzisia żodyn se tam swojigo klepeta nie rozraził. Tak rozmyślóm nad tym, że możne by było dobre szpecyjalnie ukazować ty dziurawe zabytkowe cesty lufciorzóm i letnikorzóm, to możne łóni by kogosi napytali, coby to doł wartko zrychtować. Dzisio sie wszedcy przesmrodzajóm po Głymboki, bo zustała łóna zrychtowano do porzóndku, ale za to trzeja mieć łoczy dołokoła głowy odewrzite, coby nie dać sie przejechać jakimusikej autu, kiere dzisio śmigajóm tam jedyn za drugim a miały podobnierz uż tam nigdy nie jeździć.
Mini słownik gwary cieszyńskiej:
dycki - zawsze, kansi - gdzieś, podziwać - popatrzeć, wieca - rzeczy, skyrs - z powodu, kszeft - sklep, mitrynżyć - marnować, we starości - w opiece, cesta - droga, godzóm sie - nadają się, wciepane - wrzucone, pod blache - do pieca, rozrażóne - uszkodzone, sztokerlik - taboret, błozna - żarty, letnikorz - wczasowicz, ganc - całkiem, klepeta - nogi, napytali - namówili, zrychtować - naprawić, przesmrodzać sie - spacerować, dano do porzóndku - jest naprawiona.
Tóż mjyjcie sie wszedcy dobrze i wiesiołego popióntku
Redakcja nie ponosi odpowiedzialności za treść komentarzy pozostawionych przez internautów. Komentarz dodany przez zarejestrowanego użytkownika pojawi się na stronie natychmiast po dodaniu. Anonimowy komentarz zostanie opublikowany z opóźnieniem, po jego akceptacji przez redakcję. Komentarze niezgodne z regulaminem będą usuwane.
Dodaj komentarz