“Gdo sie za swój jynzyk wstydzi takim nich sie każdy brzidzi”
"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"
POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie tóm biołóm szczałke w tej czyrwiónej kostce, kieróm nóńdziecie pod spodkym”.
Bez oprziska
Kiejsi ludzie wszecko rychtowali se sami, coby to mieć dycki porynczne i coby każdo wiec była dłogi roki przidajno. Dzisio to ganc inakszyj wyglóndo, bo wszecki wieca obsztelowuje sie w internecie i dziepro nieskorzij, jak łóne przidóm nóm do chałupy, to widać jaki majóm chyby. Rotuzowi też isto tak robióm, bo widać to po tych ławkach, kiere postawióne sóm na Głymboki. Bo przeca czy gdo kaj widzioł ławkem bez oprziska? Isto nie podarzi mi sie zozdrzić do zogródka łod kieregosi rotuzowego urzyndnika, coby podziwać sie jaki łón mo w nim ławki, ale na zicher wiym, że majóm oprziska. Dycki to je tak, że cudzymu człowiekowi wcisko sie mało przidajne, abo aji felerne wieca. Tóm samóm chybe majóm ty zieleźne kiśnie, do kierych ludzie wciepujóm rozmajty maraz, bo kierysi zabył obsztelować do nich pudliczka na wciepawani niezgaszónego czyka. Łod czasu jak sie nie śmiy kurzić w gospodach, ani inszych barach, to tustelocy i lufciorze kierzi szmatlóm sie po Głymboki, muszóm przeca kansi zagasić to czyko. Skyrs tego, ty zieleźne kiśnie do kierych wciepowane sóm rozmajte ditki i insze zbyteczne charapuci, sóm całe po wyrchu zmazane łod petów. Pieknie to nie wyglóndo, ale żodnego urzyndnika s rotuza to dzisio nie interesuje, bo uż mo insze wieca we starości, kiere musi obsztelować. Że do dzisia żodyn na to nie prziszeł, coby do tych zieleźnych koszy na śmieci prziszrubować jaksi małe pudliczko na ty wszecki czyka, tego nie wiym, ale jak to poczyto to możne na to przidzie.
Mini słownik gwary cieszyńskiej:
kiejsi - kiedyś, dycki - zawsze, porynczne - ergonomiczne, przidajne - potrzebne, ganc - całkiem, wieca - rzeczy, obsztelowywuje - zamawia, nieskorzij - później, chyba - niedoskonałość, oprzisko - oparcie, nie podarzi - nie uda się, zozdrzić - zobaczyć, podziwać - popatrzeć, cudzy - obcy, felerne - wadliwe, kiśnia - skrzynia, mraz - nieczystość, czyko - niedopałek, pety - niedopałki, lufciorz - turysta, szmatlóm sie - szwendają się, skyrs - z powodu, ditka - torebka papierowa, charapuci - zbędne rzeczy, we starości - w opiece, prziszrubować - przykręcić, na to przidzie - na to wpadnie.
Tóż mjyjcie sie wszedcy dobrze i wiesiołego popióntku
Redakcja nie ponosi odpowiedzialności za treść komentarzy pozostawionych przez internautów. Komentarz dodany przez zarejestrowanego użytkownika pojawi się na stronie natychmiast po dodaniu. Anonimowy komentarz zostanie opublikowany z opóźnieniem, po jego akceptacji przez redakcję. Komentarze niezgodne z regulaminem będą usuwane.
.JPG)
Dodaj komentarz