Naswol cosi kómusi wynokwić, to ni ma nigdy dobre, bo skyrs tego mogymy narobić se dycki ostudy. Gorzij jak to naswol je tak zrobióne, że nie poradzymy dónś do tego, kiery nóm to wyrychtowoł. fot: FJD
CO TYDZIYŃ PO NASZYMU: To ni ma dobre, fórt kómusi robić cosi naswol
“Gdo sie za swój jynzyk wstydzi takim nich sie każdy brzidzi”
"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"
POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie tóm biołóm szczałke w tej czyrwiónej kostce, kieróm nóńdziecie pod spodkym”.
Naswol
Naswol cosi kómusi wynokwić, to ni ma nigdy dobre, bo skyrs tego mogymy narobić se dycki ostudy. Gorzij jak to naswol je tak zrobióne, że nie poradzymy dónś do tego, kiery nóm to wyrychtowoł. Kapkem je takich wiecy w naszym mieście, na kiere jak sie podziwómy, to zarozinko wiymy że kierysi to zrobił naswol. Moc razy to je tak, że ta wiec zrobióno naswol żodnymu ni ma na nic przidajno, ale dycki ś nióm je moc ostudy. Uż downo tako jedna wiec, kiero isto je zrobióno naswol, ciepła mi sie na łoczy i dzisio psziszeł na to czas coby ło tym napisać. Dłógi czas, a możne że aji dógi roki wedla tego kszeftu na Zamkowej w kierym se mogymy obsztelować rozmajte kuchynie i odmaryje, było kapkem placu na postawiyni se swojigo auta. Ale znaszeł sie gdosi taki, co mu to zawadzało, abo możne że to zrobił naswol i kozoł tam do ziymi weprać takóm świycóncóm gelendre. Skyrs czymu łona je świycónco tego nie wiym, ale za to, tak dobrze zawadzo, coby uż żodyn se tam swojigo auta nie postawil. Coby eszcze tego było mało, to zustała tam do ziymi weprano tako zieleźno ruła s prziszrubowanym znakym drogowym. Tyn znak prawi nóm ło tym, że jak by baji aji sie nóm podarziło jakosi postawić tam wedla tej gelendry auto, to sztrof mómy pewny. Szło by to eszcze jakosi wyrozumieć, jakby ta kostka s tego trotuaru zustała wyrargano, a na jeji miejsce zustoł zasioty tam trownik, ale pokiel łona tam bydzie, to każde auto szło by tam dzisio eszcze postawić i styknie yno s tej ziymi te świycóncóm gelendre wytargać i uż bydzie po radości.
Redakcja nie ponosi odpowiedzialności za treść komentarzy pozostawionych przez internautów. Komentarz dodany przez zarejestrowanego użytkownika pojawi się na stronie natychmiast po dodaniu. Anonimowy komentarz zostanie opublikowany z opóźnieniem, po jego akceptacji przez redakcję. Komentarze niezgodne z regulaminem będą usuwane.
Dodaj komentarz