Dycki jak człowiek przeszpacyruje sie po Cieszynie, to na cosi zaimawego musi trefić. Nie wiym czy uż tustelokóm ciepnył sie na łoczy tyn żółty autobus na kierym je ze zadku namalowany chłop, kiery czyto gazetem, ale jesi ni, to niech sie pośpiychnóm. fot: FJD
CO TYDZIYŃ PO NASZYMU: Czytać gazetem we smrodzie, to ni ma dobre
“Gdo sie za swój jynzyk wstydzi takim nich sie każdy brzidzi”
"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"
POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie tóm biołóm szczałke w tej czyrwiónej kostce, kieróm nóńdziecie pod spodkym”.
Na czornej tabulce
Dycki jak człowiek przeszpacyruje sie po Cieszynie, to na cosi zaimawego musi trefić. Nie wiym czy uż tustelokóm ciepnył sie na łoczy tyn żółty autobus na kierym je ze zadku namalowany chłop, kiery czyto gazetem, ale jesi ni, to niech sie pośpiychnóm. Wszecko dzisio idzie zareklamować i to w takich miejscach, ło kierych sie ani żodnymu nie śniło. Namalować jednakowóż chłopa na autobusie, kiery czyto gazetem, a s auspufu na niego wali czorny dym, to je naprowdem opowoga. Kiery prziszeł na to tego nie wiym, ale sie mi zdo, że kómósi chybiło w czepóni kapkem rozumu. Bo nie wiym czy rozchodzi sie ło to, coby nahósować ludzi do kupowanio gazet, czy raczyj do czytanio rozmajtych wiecy we smrodzie, kiery wali im do gybmy. Tego sie isto nie dowiymy, bo isto ci, co tyn malunek wyszpekulyrowali sami tego nie wiedzóm. Idzie też w naszym mieście uwidzieć rozmajte chwolidła, kiere stojóm na cestach przed gospodami, a na kierych idzie poczytać, czego sie mogymy najeś i napić jak wlezymy do postrzodka. Trefiłech na takóm jednóm małóm gospodem, kiero na czornej tabulce napisane mo biołóm krejdóm wszecko to, na co czako nasz bachórz. Kapke nie bardzo chce mi sie wierzić w to wszecko co tam idzie poczytać na tej czornej tabulce, bo to ni ma możne, coby aże trzi a dwacet rozmajte wieca do jedzynio i picio szło tam u nich dostać. Je tam tego tak moc, że na iste nikiere gospody ani we Warszawie abo we Krakowie aże tela rozmajtego jedzynio ni majóm we swoji ofercie.
Redakcja nie ponosi odpowiedzialności za treść komentarzy pozostawionych przez internautów. Komentarz dodany przez zarejestrowanego użytkownika pojawi się na stronie natychmiast po dodaniu. Anonimowy komentarz zostanie opublikowany z opóźnieniem, po jego akceptacji przez redakcję. Komentarze niezgodne z regulaminem będą usuwane.
Dodaj komentarz