Szrajtofa schudnie

Dzisio bydymy szpacyrować za szczypiónkóm prociw grypie, ale ni yno po Cieszynie, ale po całym powiecie. Bydzie to dzisio tako insztrukcyja dlo tych, co uż sóm jakisi czas na pyndzyji i majóm moc nadbytnigo czasu. Bydzie to fest przidajne dlo wszeckicch starek i starzików, kierzi eszcze poradzóm wyrozumieć naszóm cieszńskóm rzecz. Nie wiym czy wszedcy wiedzóm, ale tustelocy kierym podarziło sie przehópnóć sześdziesiónt piyńć roków, to majóm te szczypiónkem moc łacniejszóm. Zaś tym, kierym pizło uż siedymdziesiónt piyńć roków dostanóm jóm s darma. Worce ło tym wiedzieć, bo jak sie to podarzi, to w kapsie zustanie nóm pińdziesiónt złociszów, kiere pudzie udać na insze wieca. Rychlij jednakowóż trzeja nawszczywić swojigo dochtora i popytać go, coby napisoł nóm recept na lyk prociw grypie. Jak uż tyn recept mómy w gorści, abo w telefónie to trzeja sie wywiedzieć kaj na niego idzie cylnóć. Ni ma to taki leki, bo jo akurat na to zmitrynżył aże sztyry tydnie, coby naroz we Skoczowie na takóm sczypiónkem trefć. Trefić, a kupić to sóm dwie ganc rozmajte wieca, bo dycki rychlij trzeja dować pozór na swojigo dochtora, coby tyn recept napisoł jak sie patrzi. Bo jak na nim nie dej boże dochtór nie szkryfnie, że to mocie mieć s darma, to rzeście sóm przegrani i wasza szrajtofla schudnie ło pińdziesónt złotych. Jak uż to wszecko jakosi wóm sie szczynśliwie podarzi i ta szczypiónka nóndzie sie we waszej kapsie, to se ani po cichu nie myście, że zaros jakosi siostrziczka w biołym mantlu pichnie wom jegłe do ramiynio. Coby łona mógła was pichnóć, to eszcze roz musicie zónś do swojgo dochtora i go popytać, coby łón doł na to powolyni.

Mini słownik gwary cieszyńskiej:

prociw - przeciw, na pyndzyji - na emeryturze, nadbytnigo czasu - nadmiernego czasu, przidajne - potrzebne, poradzóm - potrafią, cieszyńskóm rzecz - cieszyńską mowę, podarziło - udało się, przehópnóć - przeskoczyć, łacniejszo - tańsza, recept - recepta, worce - warto, insze wieca - inne rzeczy, rychlij - szybciej, nawszczywić - odwiedzić, popytać - poprosić, kaj - gdzie, cylnóć - trafić, zmitrynżył - zmarnował, dycki - zawsze, s darma - za darmo, szrajtofla - portmonetka, sie podarzi - uda się, siostrzyczka - pielęgniarka, mantel - płaszcz, jegla - igła, pichnąć - ukłuć, powolyni - pozwolenie.

Tóż miyjcie sie wszedcy dobrze i wiesiołego popióntku!