“Gdo sie za swój jynzyk wstydzi takim nich sie każdy brzidzi”
"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"
POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie tóm biołóm szczałke w tej czyrwiónej kostce, kieróm nóńdziecie pod spodkym”.
Jednoglajzowy cug
Ni ma na to żodnych widoków, coby eszcze tego roku, ta nasza Głymboko doczkała sie porzóndnego zrychtowanio. Przerozmajte wieca uż sie tam na ni przitrefiły, ale ta jedna glajza kiero kludzi łod Zamkowej aże do Mynniczej je naprowde moc zaimawo. Nie wiym czy kierysi to wyszpekulyrowoł, bo widzioł kansi taki cug co gzuje po jednej glajzie, ale sie mi zdo, że isto kitajców do dzisia żodyn ś nich nie nawszczywił. Przeca Azyjaci uż dłógi roki społym s Niymcami nad tym rozmyślajóm i jakosi do dzisia jim sie to nie podarziło. Przeca my sóm dycki mónrzejsi i wszecko bez łoglóndanio sie na inszych muszymy zrobić sami, chocioż nieskorzij to sie na nic nie godzi. Ta glajza ło kierej je rzecz, mo tam dwa skrynty, ale to możne nie wadzi, bo na zicher tyn cug bydzie po ni pomaluśku gzuł. Nie wiym yno czy obstojóm sie ty latarnie, kiere tam stojóm ganc wedla tej gajzy, jesi nie zustanóm szybniynte kapke dalij na tym trotuarze. Możne, że sie to nie udo, bo kable ze sztrómym kiere kludzóm do nich, nie do sie nadsztiklować i skyrs tego nie pudzie pszeszybować ś nimi porem cyntymetróm dalij. Możne też, że isto kierysi tak to wyszpekulyrowoł, że tyn wagón, kiery bydzie po ni gzuł bydzie ciynki jak żyrafa i kolem tych latarni jakosi sie przeciśnie. To wszecko sie podarzi, ale nejprzód do tej glajzy gdosi musi wstyrczyć jakisi magnez, kiery tyn cug bydzie poradzioł dzierżeć porem cyntymetrów w lufcie. Jako i kómu sie podarzi wyrychtować taki jednoglajzowy cug tego nie wiym, ale na zicher bydzie to turystyczno atrakcyja naszego Cieszyna.
Mini słownik gwary cieszyńskiej:
zrychtować - naprawić, wieca - rzeczy, glajza - szyna, kludzi - prowadzi, zaimawo - interesująca, kierysi - ktoś, wyszpekulyrowoł - wymyślił, cug - pociąg, gzuje - pędzi, nawszczywił - odwiedził, społym - wspólnie, nie podarziło - nie udało, dycki - zawsze, nieskorzij - później, sie nie godzi - nie nadaje się, skrynt - zakręt, na zicher - na pewno, obstojóm sie - przetrwają, wedla - obok, szybniynte - przesunięte, kapke - trochę, sztróm - prąd, kludzóm - prowadzą, nadsztiklować - nadstawić, skyrs - z powodu, przeciśnie - przepchnie, sie podarzi - uda się, wstyrczyć - włożyć, dzierżeć - trzymać, w lufcie - w powietrzu, wyrychtować - skonstruować
Tóż miyjcie sie wszedcy dobrze i wiesiołego popióntku.
Redakcja nie ponosi odpowiedzialności za treść komentarzy pozostawionych przez internautów. Komentarz dodany przez zarejestrowanego użytkownika pojawi się na stronie natychmiast po dodaniu. Anonimowy komentarz zostanie opublikowany z opóźnieniem, po jego akceptacji przez redakcję. Komentarze niezgodne z regulaminem będą usuwane.
Dodaj komentarz