”..chrónióm ludzi przed deszczym... fot. FJD

Dycki po zadku

Jakisi czas tymu, w tym mojim felyjetónie była rzecz ło tym, jakóm to majóm tustelocy ostudem ze spoczywanim na ławkach jak padze deszcz, na tym naszym nowym cieszyńskim banhofie. Przeca mało kiedy s nieba deszcz rowno na ziym padze, a tym tuplym jak w Cieszynie dziynnie wiater fest ducho, to ty ławki sóm wiecznie mokre. Rozchodzi mi sie ło to, że ci macherzi łod stawianio rozmajtych dachów ni majóm we starości tego, coby tyn dach chrónił ludzi przed deszczym, a yno to, coby se stoł porem metrów nad jejich głowami. Ganc inakszyj idzie to uwidzieć w Cz.Cieszynie, kaj na tej Hlavni Trzidzie postawióne sóm autobusowe przistanki, kiere naprowde chrónióm ludzi przed deszczym. Zaś u nas w Cieszynie na Wyższej Brómie przistanki ni majóm żodnych daszków i ludzie jak padze dycki moknóm. Tak rozmyśłom nad tym, skyrs czymu my sóm dycki po zadku za Czechami ? Mómy ich przeca za Olzóm i podziwać sie na nich s bliska, jako robióm ty rozmajte wieca, kiere pumogajóm im lekciyj żyć, to nima przeca procno wiec. To nie trzeja być wielkim uczónym, coby prziś na to, że jak padze to naszo oblyczka bydzie wartko ganc mokro i taki stoci na przistanku, kiery nas przed deszczym nie chróni to ni ma nic do śmiychu. A możne to je tak, że tustelocy po tej nasze strónie Olzy sóm nieprzemakalni i skyrs tego mogóm dycki całymi godzinami stoć na deszczu. Gorzij je w zimie jak śniegym fujo, to tym tuplym przidałoby sie ludzióm kapkem ulżyć i nad głowami postawić chocioż jakómsi małóm schrane.

Mini słownik gwary cieszyńskiej:

była rzecz - był temat, ostuta - kłopot, padze - pada, banhoaf - dworzec, tym tuplym - tym bardziej, fest ducho - mocno wieje, we starości - w świadomości, ganc - calkiem, to uwidzieć - to zobaczyć, dycki - zawsze, po zadku - spóźnieni, podziwać sie - poatrzeć się, wieca - rzeczy, lekciyj - lżej, procno - trudna, skyrs - z powodu, fujo - wieje, kapkem - trochę, schrana - ochrona.

Tóż miyjcie sie wszedcy dobrze i wiesiołego popióntku.