Przi niedzieliczce, coby nie zapomnieć naszej rzeczy: Wedla cesty

...na kierym pisze STOŁÓWKA je nejwiynkszo...". fot. FJD

”...tretuar kóńczy sie przi nowym depo...". fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Wedla cesty

Widzym, że na każdej dziedzinie tustelocy łoglóndajóm sie kolem siebie i widzóm wszecko to, co chcieliby mieć inakszyj zrychtowane. Je to ganc inakszyj jak w cyntrum, bo tam ludzie jak przidóm do chałupy to zawrzóm za sobóm dwiyrze i ło nic wiyncyj sie nie starajóm. Zeszły tydziyń spotkoł mie jedyn panoczek, kiery miyszko w Krosnej na prociw starej szkoły i pytoł mie co bych też cosi napisoł ło tym chodniku wedla cesty, kiery idzie ku Cieszynu. I fakt, tyn chodnik, a kiejsi my na to prawili tretuar kóńczy sie przi nowym depo a po drugi strónie przi hurtowni dlo elektrykorzi. A co dalij ci młodziocy z dzieckami we wózkach majóm zrobić to uż ło to łojcowie Cieszyna ni majóm żodnej starości. Możne, że to kierysi s urzyndników poczyto i pośle tam jakisi mały bager, coby ku Cieszynu pociś dalij tyn chodnik. Cesta tam je uż ganc rowno i yno tyn chodnik wszeckich mierzi, bo zakiel go nima to trzeja w nerwach ciś wózek po ceście. Pół biydy jak je to za widoka, ale łopowoga je to wielko szpacyrować tam po cimoku. Kapke dalij trefiymy na nejwiynkszóm chałupe w Krosnej co kiejsi w ni kszefcili auciskami, kiere Daewoo sie mianowały. Tyn werk autowy we Warszawie jakosi wartko klynknył i przedowani tych aut sie na dobre zahaltowało. Teraz w tej chałupie robióm jakisi rosmajte wieca i gesztele, kiere przidajne sóm przi każdej budowie. S daleka nie bardzo widać co tam je, bo szyld majóm taki maluśki ,że jak sie jedzie autym to ciynżko go je poczytać. Za to szyld na kierym pisze STOŁÓWKA je nejwjynkszy i kiery nie wiy co łóni tam wyrobiajóm to bydzie rozmyśloł yno o wciepaniu czegosi na ruszta.

Mini słownik:

dziedzina - wieś,

zrychtowane - zrobione,

dwiyrze - drzwi,

zakiel - dopóki,

wedla - obok,

depo - strażnica,

dziecka - dzieci,

nie zaimo - nie interesuje,

ciś - pchać,

cesta - droga,

łopowoga - odwaga,

po cimoku - po ciemku,

zahaltować - zatrzymać,

wieca - rzeczy,

gesztele - mechanizmy,

wciepać - wrzucić.

Tóż mjyjcie sie wszedcy dobrze i wiesiolej niedzieliczki!

Dzisiejszy tekst ma tytuł "Wedla cesty".