CO TYDZIYŃ PO NASZYMU: Wygibani idzie nóm na zdrowi

Pieknie pozdrowióm!
Jak czytóm, co pón Dral pisze ło tej Strefie Zdrowia, w kierej dyskryminujóm płeć mynskóm, to aż mi sie chce płakać. Za co nas to majóm! Bo jak trzeba zarobić grejcarki, aby nasze baby miały za co se niechać masyrować pleca, ciapkać zadki, saunować sie, maseczki robić i dioboł wiy, co jeszcze, to my, chłopi, sóm dobrzi. Ale jak by sie miały z nami podzielić ło kapke tych rozkoszy, tak to już ni ma pana, to zacznóm wrzeszczeć: prr! nie dómy! nie puszczymy! co je nasze, to je nasze... chłopi chodzóm na piwo, tak my zaś mómy wellnesss...
Jak tak, tóż tak. Zebrało sie pore chłopów z drugi stróny Beskidów w niedalekim Rożnowie pod Radgoszczym, dali głowy do kupy i co nie wymyślili? Piwne łaźnie! Tam sie może chodzić jyny porami, baba ni może iść sama, jyny z chłopnym. Nó, chyba, że je inaczy nałoriyntowano, potym se może wziónść kamratke (regulamin ale nie pozwolo brać ze sobóm dómowe zwiyrzoki).
Jak przidziecie na miesjce, tak z was zebleczóm wszystki lónty, dajóm biołe rynczniki, do kierych sie zawiniecie. Potym każdymu wcisnóm do rynki krygiel z piwym (tak je, jako prawiym) i hajda!... do parowej łaźnie. Przi tym wóm puszczajóm medytacyjnóm muzyke a jedyn pón z reproduktora mówi niby poważnie ło technikach relaksacyje, ale to je powaga jyny na łoko, bo co chwila z tumanów pary dochodzóm wybuchi śmiychu. Jak sie sauna skóńczy, tak gryfno frelka sie was spyto, jak szmakowało piwko i wóm wciśnie do rynki dalszy krygiel. Potym zakludzi was aj waszóm partnerke do dyskretnej izby, kaj świycóm jyny solne świyczki a kaj na postrzodku stoji dymbowo kadź z ciepłym niekwaszónym spiyniónym czornym piwym – jasne, że na kómpani. Tam sie ze swojóm babóm usadzicie w rajskim stroju, piwko wóm wónio, ciepło kómpieli was pieknie rozebiere... co wóm bedym jeszcze prawił. A za chwile zaś tam wlezie to dziywczacko, bardzo słósznie pyto ło przeboczyni, że łóna nie chce przeszkadzać, jyny sie musi spytać, czy kómusi nie trzeba doloć piwa. A za pół godziny przidzie zaś, że jyny wóm idzie zrobić maseczke z piwnych drożdży. Jak sie już łokómpiecie, wysuszycie i wychłódniecie w suchej płachcie, tak na dole w przitulnym barze czako na was piekno kelnerka i sie pyto, jaki piwko byście se po mynczóncych procedurach życzyli? Jasne, ciymne, czy alkoholizowane ?
Chłopi, prawiym wóm, smolcie na Strefe Zdrowia, naszporujcie pore drobnych i biercie Waszóm babe do Rożnowa. A jak by ta Wasza nie chciała iść, tak jedźcie z jakómsi inszóm.
Pytoł żech sie, jak na pomysł z tymi łaźniami prziszli. Nó i że snoci rożnowski piwo nie szło moc na łodbyt, bo ło pore kilometrów dali warzóm w Noszowicach znamiynity Radegast, tóż wyszpekulowali, że jak zrobióm prosto w piwowarze łaźnie. Tak że sie im bedzie to ich nie bardzo wydarzóne piwo lepi mijać.
Tóż sie pytóm – ni mógła by to być inszpiracyja dlo producyntów naszego Brackigo? (jasne, że bez łobrazy!!, panowie, jyny bez łobrazy...) .
Miyjcie sie dobrze!