, poniedziałek 26 września 2022
CO TYDZIYŃ PO NASZYMU: Wygibani idzie nóm na zdrowi
"...elektrykorz to mo lekóm robotem...". fot: FJD



Dodaj do Facebook

CO TYDZIYŃ PO NASZYMU: Wygibani idzie nóm na zdrowi

F.J.DRAL
CO TYDZIYŃ PO NASZYMU: Wygibani idzie nóm na zdrowi

"...Stefa Zdrowia egzystuje w taki pieknej zogrodzie...”. fot. FJD


CO TYDZIYŃ PO NASZYMU: Wygibani idzie nóm na zdrowi

"...to uwidzymy eszcze dwa szyldy...". fot. FJD


CO TYDZIYŃ PO NASZYMU: Wygibani idzie nóm na zdrowi

Dzisio Wóm zaś poczytóm po naszymu opowiadanie "Złodzieje czasu" Henryka Jasiczka, z książki "Humoreski Beskidzkie". fot. FJD

"Gdo sie za swój jynzyk wstydzi takim niech sie każdy brzidzi".

cd. słownika:

blafnóć - palnąć głupotę
Blafnył dzisio pore razy i uż go móm doś.

blajchować - wybielać płótno na słońcu
Kapke mi ta cycha zeżółkła i muszym jóm blajchować.

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydze rozumioł
to jyny wiater bydzie po naszymu szumioł"

Pożyjóm sto roków

Jak sie wóm podarziło pozbyć dyrbanio wolantym i s uśmiychniyntóm gymbóm wyderziliście s autym ku Biylsku to mocie szczynści, bo niekierzi musieli zaroz sie wedla zastawić u autowego elektrykorza. Dzisio taki elektrykorz to mo lekóm robotem bo zapnie auto do kómputera i uż wszecko wiy. Kiejsi to musioł pomacać wszecki dróty a i to eszcze nie było zicher czy tyn feler nóndzie. Nejgorzij je dzisio s tóm elektrykóm jak auto zamoknie to żodyn fachman łod tej elektryki ani nie dychnie. A dzisio fórt s niebiesiech co chwila leci jakosi szudera s krupami i jak eszcze stanymy kansi niżyj to za chwilym tam kaj była cesta bydymy stoć w potoku abo rzyce. Niekiere kszefty co uwidzymy dalij mojóm uż ganc fajne miana ale trzeja moc sie nakłopocić coby na to prziś co zaś łóni chcóm nóm wciś. Dejmy na to tako “Strefa Zdrowia” egzystuje w taki pieknej zogrodzie i wyglóndo na to, że wszecko co je za płotym to je chore a tam w postrzodku ty paniczki co sie bydóm wygibać pożyjóm sto roków. Ta sterfa mo piyńć rozmajtych tajli co mogymy poczytać na wielki płachcie kiero stoji przed bramkóm. O chłopach sie tam żodyn ani nie zajónknył bo możne,że całym tym kszeftym rzóndzóm baby. Uznały isto, że chłopóm żodno strefa zdrowio ni ma do niczego potrzebno bo lepszyj coby rychlij umiyrali i na staroś nie dopalowali swoich paniczek. Jak wlezymy do tej zogrody kaj je ta “Stefa Zdrowia” to uwidzymy eszcze dwa szyldy na kierych wubec sie nie wyznocie i ani sie nie dowiycie co tam robióm i czym kszefcóm. Isto to nima nic wielkigo bo ty chwolidła na tym balkónie majóm taki maluśki coby możne żodyn ich tam nie dopalowoł bo robotem majóm kaj indzij.

A teraz zaś fajny wic:

- Francek je to prowda żeś sie łożynił?
- Ja to je prowda!
- To musisz być isto szczynśliwy?
- Żebyś wiedzioł. Muszym!

Mjyjcie sie wszedcy dobrze i wiesiołego popióntku.

Dzisio Wóm zaś poczytóm po naszymu opowiadanie "Złodzieje czasu" Henryka Jasiczka, z książki "Humoreski Beskidzkie".

Komentarze: (1)    Zobacz opinię czytelników (0)    Dodaj opinie
Redakcja nie ponosi odpowiedzialności za treść komentarzy pozostawionych przez internautów. Komentarz dodany przez zarejestrowanego użytkownika pojawi się na stronie natychmiast po dodaniu. Anonimowy komentarz zostanie opublikowany z opóźnieniem, po jego akceptacji przez redakcję. Komentarze niezgodne z regulaminem będą usuwane.

Pieknie pozdrowióm!
Jak czytóm, co pón Dral pisze ło tej Strefie Zdrowia, w kierej dyskryminujóm płeć mynskóm, to aż mi sie chce płakać. Za co nas to majóm! Bo jak trzeba zarobić grejcarki, aby nasze baby miały za co se niechać masyrować pleca, ciapkać zadki, saunować sie, maseczki robić i dioboł wiy, co jeszcze, to my, chłopi, sóm dobrzi. Ale jak by sie miały z nami podzielić ło kapke tych rozkoszy, tak to już ni ma pana, to zacznóm wrzeszczeć: prr! nie dómy! nie puszczymy! co je nasze, to je nasze... chłopi chodzóm na piwo, tak my zaś mómy wellnesss...
Jak tak, tóż tak. Zebrało sie pore chłopów z drugi stróny Beskidów w niedalekim Rożnowie pod Radgoszczym, dali głowy do kupy i co nie wymyślili? Piwne łaźnie! Tam sie może chodzić jyny porami, baba ni może iść sama, jyny z chłopnym. Nó, chyba, że je inaczy nałoriyntowano, potym se może wziónść kamratke (regulamin ale nie pozwolo brać ze sobóm dómowe zwiyrzoki).
Jak przidziecie na miesjce, tak z was zebleczóm wszystki lónty, dajóm biołe rynczniki, do kierych sie zawiniecie. Potym każdymu wcisnóm do rynki krygiel z piwym (tak je, jako prawiym) i hajda!... do parowej łaźnie. Przi tym wóm puszczajóm medytacyjnóm muzyke a jedyn pón z reproduktora mówi niby poważnie ło technikach relaksacyje, ale to je powaga jyny na łoko, bo co chwila z tumanów pary dochodzóm wybuchi śmiychu. Jak sie sauna skóńczy, tak gryfno frelka sie was spyto, jak szmakowało piwko i wóm wciśnie do rynki dalszy krygiel. Potym zakludzi was aj waszóm partnerke do dyskretnej izby, kaj świycóm jyny solne świyczki a kaj na postrzodku stoji dymbowo kadź z ciepłym niekwaszónym spiyniónym czornym piwym – jasne, że na kómpani. Tam sie ze swojóm babóm usadzicie w rajskim stroju, piwko wóm wónio, ciepło kómpieli was pieknie rozebiere... co wóm bedym jeszcze prawił. A za chwile zaś tam wlezie to dziywczacko, bardzo słósznie pyto ło przeboczyni, że łóna nie chce przeszkadzać, jyny sie musi spytać, czy kómusi nie trzeba doloć piwa. A za pół godziny przidzie zaś, że jyny wóm idzie zrobić maseczke z piwnych drożdży. Jak sie już łokómpiecie, wysuszycie i wychłódniecie w suchej płachcie, tak na dole w przitulnym barze czako na was piekno kelnerka i sie pyto, jaki piwko byście se po mynczóncych procedurach życzyli? Jasne, ciymne, czy alkoholizowane ?
Chłopi, prawiym wóm, smolcie na Strefe Zdrowia, naszporujcie pore drobnych i biercie Waszóm babe do Rożnowa. A jak by ta Wasza nie chciała iść, tak jedźcie z jakómsi inszóm.
Pytoł żech sie, jak na pomysł z tymi łaźniami prziszli. Nó i że snoci rożnowski piwo nie szło moc na łodbyt, bo ło pore kilometrów dali warzóm w Noszowicach znamiynity Radegast, tóż wyszpekulowali, że jak zrobióm prosto w piwowarze łaźnie. Tak że sie im bedzie to ich nie bardzo wydarzóne piwo lepi mijać.
Tóż sie pytóm – ni mógła by to być inszpiracyja dlo producyntów naszego Brackigo? (jasne, że bez łobrazy!!, panowie, jyny bez łobrazy...) .
Miyjcie sie dobrze!

Dodaj komentarz

Zawartość pola nie będzie udostępniana publicznie.
  • Adresy internetowe są automatycznie zamieniane w odnośniki, które można kliknąć.
  • Dozwolone znaczniki HTML: <em> <strong> <cite> <code> <ul> <ol> <li> <dl> <dt> <dd>
  • Znaki końca linii i akapitu dodawane są automatycznie.

Więcej informacji na temat formatowania

Image CAPTCHA
Wpisz znaki widoczne na obrazku.
reklama
reklama