CO TYDZIYŃ PO NASZYMU: Mieć zogródke to nima tak leko, bo na wiosnem trzeja tam cosi zasioć

”...spoza chrostóww wystowajóm czyrwióne dachy...”. fot. FJD

”...stoji na dwóch nogach wielki chwolidło...”. fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Rodzinne zogródki

Tak se myślym skyrs czego ci wanelicy w Krosnej majóm mjynszóm kaplicem jako kiejsi mieli katolicy. Mało tego łóni, ci katolicy tacy byli szprytni, że poradzili jakosi to załatwić i jóm obalić a kapkem dalij wystawić wiynkszóm i zrobić s tego parafije. Kiejsi żech wyczytoł, że każdo budowa s przed pińdziesiyńciu roków to je zabytek i jak yno sie go do poprawić i porzóndnie opucować to może stoć do kóńca świata a możne, że eszcze jedyn dziyń delij. Nie wiym wiela tu dzisio w Cieszynie i powiecie je łobóch wiar, ale jak jo chodził do szkoły to nas było po rowno. A możne że roschodzi sie ło to, że wanelicy majóm tu w Cieszynie nejwiynkszy kaściół w Polsce i coby to nadrobić trzeja mieć pore mjynszych katolickich wedla. Abo możne, że katolicy w Krosnej zbogatli i skyrs tego wystawili se nowy kościół, coby wanelikóm ukozać, kiery tu je ważniejszy i śnim sie trzeja bardziyj rachować. Na prociw po drugi strónie cesty stoji na dwóch nogach wielki chwolidło, kiere namowio nas coby wozić nasze dziecka do jakisi szkółki aże kansi na ulicem Przepilińskigo. Jako se to gdo szpekulyruje, że ty młode mamy, tych pore kilomertów po tym nie skóńczónym tretuarze bydóm ciś ty wózki tego nie wiym, ale możne tyn co to chwolidło tam wraził do ziymi pumoże to ludzióm wyoślić. Kapke dalij sóm jakisi rodzinne zogródki, kiere s daleka ganc pieknie wyglóndajóm, bo s poza płota i s poza pieknych chrostów wystowajóm czyrwione dachy łod jejich chałupek. Nie wiym yno czymu sie to nazywo rodzinne i kiery dzierży nad tym kóntrolem gdo je gdo. Bo przedstowcie se, że jo bydym tam chcioł cosi sioć i sadzić ze swojóm sómsiadkóm, a to nima rodzina - to co? Uż wiym-trzeja sie bydzie ożynić coby te rodzinnóm zogródke dostać.

Mini słownik:

skyrs - dlaczego,

delij - dłużej,

wanelicy - ewangelicy,

kiejsi - kiedyś,

opucować - otynkować,

wedla - obok,

zbogatli - zbogacili się,

wystawili - postawili,

śnim - z nim,

chwolidło - reklama,

aże - aż,

ganc - całkiem.

Miyjcie sie wszedcy dobrze i wiesiołego popióntku!

Dzisiejszy tekst ma tytuł "Rodzinne zogródki".