.”...reklamuje za darmo swój kszeft”. fot. FJD
Szpacyrkym po Cieszynie
“Gdo sie za swój jynzyk wstydzi takim nich sie każdy brzidzi”
"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"
POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie tóm biołóm szczałke w tej czyrwiónej kostce, kieróm nóńdziecie pod spodkym”.
Zieleźno kiśnia
Postawić w Cieszynie swoji auto idzie byle kaj, ale dycki trzeja sie podziwać wiela nóm za to stoci ubydzie piniyndzy we szrajtofli. Bo jesi stanymy tam kaj stoji zieleźno kiśnia do kierej wciepuje sie pinióndze, to zaroz bydymy wiedzieć wiela za to stoci rotuzowi na nas utarżóm. Gorszyj mómy, jak “podarzi” sie nóm przepómnieć i za dłógo nasze aucisko poniechane zustanie, na nie zapłacónym placu. Jaki sztraf za to dostanymy tego isto żodyn nie wiy i skyrs tego trzeja sie dycki chytać za kapsem. Sóm też taki miejsca na kierych idzie stoć za darmo i skyrs tego co szprytniejsi poradzóm poniechać tam swoji auciska, aji porem roków. Je też taki jedyn szprytny geszefciorz, łod kierego auto stoji uż dłógi roki na tym samym placu i reklamuje tam za darmo swój kszeft. Żodnego to jednakowóż nie mier-zi, chocioż miastowi uż łóńskigo roku kozali poskludzać wszecki chwolidła, kiere wisiały na płotach i na ścianach rozmajtych chałup. Ale że dwiyrze łod auta to ni ma płot ani ściana, to też skyrs tego isto idzie na nich reklamować co sie yno żywnie kómu podobo. Aż dziw biere, że eszcze żodyn inszy nie prziszeł na to i wedla niego nie postawił swojigo auta ze swojóm reklamóm. Jednakowóż trefjajóm sie też tacy szoferzi, kierzi poradzóm przeproszać za to, jak postawióm auto tam kaj nima na to powolynio i eszcze niechać za szybóm wyłoślyni na kartce. Na takigo jednego nieszczynśnika podarziło mi sie zeszły tydziyń trefić na ulicy Regera, kierymu akumulator zrobił kaput i musioł poniechać tam swoji auto.
Mini słownik gwary cieszyńskiej:
kaj - gdzie, sie podziwać - popatrzeć się, sztrajtofla - portmonetka, zieleźno kiśnia - żelazne pudło, wciepuje - wrzuca, utarżóm - zarobią, podarzi sie - uda się, poniechane - zostawione, sztraf - kara, skyrs - z powodu, dycki - zawsze, geszefciosz - busnessmen, kasa - kieszeń, szprytny - sprytny, kszeft - interes, łońskigo - zeszłego, poskludzać - posprzątać, chwolidło - reklama, dwiyrze - drzwi, żywnie - tylko, powolyni - pozwolenie, wyoślyni - wytłumaczenie, podarziło - udało się, kaput - zepsuło się.
Tóż mjyjcie sie wszedcy dobrze i wiesiołego popióntku
.jpg)
Dodaj komentarz