Przi niedzieliczce coby nie zapomnieć naszej rzeczy: Kónsek babucia

”...łopadka je to kónsek babucia...”. fot. FJD

"...je tela chwolideł...". fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydze rozumioł
to jyny wiater bydzie po naszymu szumioł"

Kónsek babucia

S tym kierchowym coch ło nim łostatnio pisoł toch se jyno łostudy narobił, bo dzisio aż nie pasuje pisać ło tym co eszcze sie tam na tej ulicy ruszo. A na ni po prawo mómy też moc inszych interesantnych wiecy. Je tam zaroz masorz, kiery przedowo w taki małej budce rozmajtóm wieprzowine, łowiynzine i aji rozmajte wórszty. Mo tam takóm na chodniku czornóm niedziwnóm tabulke na kierej idzie roz poczytać: ”MŁODA WOŁOWINA” a po drugi zaś jakosi “ŁOPATKA”. Jo sie tam na mjynsie nie znóm, ale tyn masorz mi wyoślił, że młodo krowa to je tako, kiero ledwie co dożyła dwa roki i prziszło ji na kóniec. A u zaś ta łopatka to je kónsek babucia kierymu też prziszło na kóniec ale mu żodyn roków nie rachuje. Kónsek dalij na płocie wiszóm rozmajte chwolidła s kierych sie mogymy wywiedzieć, że na taksiorza mogymy zwónić cały rok a na antyne do telewizora trefiymy na ulicy Matejki. Zaimawe je jednakowóż to jako łoni prziszli na to, coby ty chwolidła zawiesić w takim gupim miejscu, bo przeca żodyn nie bydzie tam s miasta przichodził coby to poczytać. Kapke niżyj na gołej parceli też stojóm chwolidła, bo przeca to by nie było możne, coby w Cieszynie marnowała sie ziym bez reklamy. Kaj sie jyno do to sie jóm wieszo i żodynymu nie przichodzi do czepani, że szkoda na to piniyndzy, kiere lepszyj byłoby dać biydokóm. Kónsek niżyj w taki małej zogródce stojóm do przedanio auta, ale też na okółko nich je tela chwolideł, że nie idzie przis na to o co sie rozchodzi i gdo cosi i na czym chce tu utarżyć.

Mini słownik

kierchów - cmentarz,

łostuda - kłopot,

wieca - rzeczy,

masorz - rzeźnik,

łowiynzina - wołowina,

wórszt - kiełbasa,

wyoślił - wytłumaczył,

babuć - wieprzek,

zaimawe - ciekawe,

zogródek - ogródek,

utarżyć - zarobić.

Mjyjcie sie wszedcy dobrze i do prziszłego tydnia.

Wychodząc na przeciw czytelnikom/internautom - miłośnikom naszej gwary w dzisiejszym i w następnych odcinkach “Co tydziyń po naszymu” będziemy łączyli tekst pisany ze słowną interpretacją. Będzie to ciekawe przeżycie dla tych internautów, którzy nie znają dobrze naszej gwary i mówione słowa przekażą im specyfikę ich używania/wymawiania, szczególnie jeżeli chodzi o akcent i nosówki. Dzisiejszy tekst ma tytuł “Kónsek babucia".