CO TYDZIYN PO NASZYMU: Żodyn ni ma taki gupi, coby płacić za to co dostanie z darma

Dziwy nad dziwy fórt w naszym pieknym mieście mogymy ogłondać, bo dycki sie tacy nóndóm, co poradzóm nóm to ukozać. Dejmy na to dwa tydnie tymu taki jedyn panoczek, kierego isto wszedcy znajóm, rozdowoł naszym dzieckóm zeszyty do szkoły. Kiejsi po zeszyty szło sie do kszeftu na Górnym Rynku, w kierym regirowoł pón Walica i u nigo szkolnicy mógli dostać wszecki szkolne wieca. Mało gdo dzisio isto pamiynto tego szykownego panoczka, kiery dycki mioł na siebie taki modry świycóncy mantel i fórt był uśmiychnióny. Dzisio mómy insze czasy, bo zaczło ludzióm nadbywać piniyndzy i nie wiedzóm, coby za nie kupić. Nieskorzij jak uż tych zeszytów chybiło znaszły sie eszcze do rozdanio rozmajte czekulady, kiere były porozciepowane po ziymi. S czekuladami dlo dziecek je tak samo jak s tymi zeszytami, bo normalnie łóne kupuje sie w kszefcie, a nie namowio sie dziecek coby na przedbyżki leciały pozbiyrać porozciepowane na ziymi. Je to do śmiychu, bo każdego uż dzisio stać na kupiyni dzieckóm czekulady w kszefcie, ale jak sie yno podarzi cosi lapnóć s darma to aji dziecka sie tam kludzi. To góniyni po rynku za czekuladami, możne bydzie jakimsi nowym cieszyńskim szportym w kierym podarzi sie nóm sióngnóć po medajle aji na olimpijadzie. Zaroz wedla tych szportowych przedbiyżek stoły budy w kierych uż za prowdziwe pinióndze szło se kupić rozmajte bibeloty do swoji chałupy. Nie było tam jednakowóż widać żodnych tusteloków, kierzi by chcieli u nich udać pinióndze, bo jak widzieli, że wedla były czekulady i zeszyty s darma to pinióndze schowali do kapsy.

Mini słownik:
fórt- ciągle,
dycki-zawsze,
kszeft-sklep,
regirowoł-kierował,
modry-granatowy,
świycóncy-błyszczący,
mantel-płaszcz,
porozciepowane-porozrzucane,
dziecka-dzieci,
przedbiyżki-wyścigi,
wedla-obok,
buda-kram,
kapsa-kieszeń

Tóż miyjcie sie wszedcy dobrze i wiesiołego popióntku