CO TYDZIYN PO NASZYMU: Letnikorze dycki szkryfióm po czym sie yno do

”...postawił dwa leżaki...”

Sóm taki wieca kiere sie widzi, ale sóm też taki, kierych sie nie widzi, bo sie kansi stracily. Mómy przeca lato i rozmajci letnikorze i lufciorze nawszczywujóm nasze piekne miasto i dycki majóm radzi kansi ze zeprzić swój zadek. Kapke tych rozmajtych pieknych chałup i inkszych wiecy do oglóndanio je w naszym mieście, tóż też tymu patrziło by sie stawiać ławki kaj sie yno do. Kiejsi stoły ławki aji przed naszym tyjaterym, ale kómusi to isto zawadzało i kozoł ich wyciepać. Możne, ze mioł taki napad, coby nawszywnicy siadali se na tych betónowych schódkach, bo na nich ciynżko je naszkryfać swoji miano. Bo przeca wszedcy wiedzóm, że trzeja dycki po sobie cosi niechać naszkryfane na gelendrze abo na ścianie, bo a nuż jakisi znómy na rok tu przyjedzie i sie dowiy, że jo też uż tu był. Dzisio rozmajci lufciorze prziszli na to, że na tych schódkach, kole tyjateru idzie sie siednóć i na betónie cosi naszkryfać. Zaś na Głymboki wedla biblioteki, kierysi postawił dwa leżaki, a wedla nich biółom kiśnie s ksiónżkami. Tak rozmyślóm czy ty ksiónżki sie eszcze na co godzóm czy sóm to jakisi nadbytni egzymparze, kierych gdosi sie chce pozbyć. Pewne na zicher te je yno to, że ty leżaki sóm kónkuryncyjóm dlo tego utarganego hamaka na kierym lygo uż gdo chce. Nikierzi aji na nim se robióm fotki i ciepióm to do facebooka, coby możne obśmioć rotuzowych wachtyrzi, kierzi udowajóm że nie widzóm, jak łóni dzierżóm w gorści flaszki s piwym. Możne, że bydzie u nas je taki zwyk, duldać piwo jak sie leży na hamaku i zarachowne to bydzie jako cieszyńsko atrakcyja .

Mini słownik:
wieca-rzeczy,
kansi-gdzieś,
letniorz-wczasowicz,
lufciorz-turysta,
nawszywujóm-odwiedzają,
dycki-ciągle,
kapke-trochę,
patrzyło by sie-powinno,
kaj-gdzie,
tyjater-teatr,
wyciepać-wyrzucić,
napad-pomysł,
naszkryfać-nabazgrać,
gelendra-poręcz,
wedla-obok,
kiśnia-skrzynka,
nadbytni-zbędne,
wachtyrz-strażnik,
dzierżóm-trzymają,
duldać-ssać

Tóż miyjcie sie wszedcy dobrze i wiesiołego popióntku