CO TYDZIYŃ PO NASZYMU: Ludzióm sie nigdy nie wygodzi, bo dycki, kierysi woli cosi inkszego

” Byli też tacy kierzi fluchcili...”

”...dzierżeli nad nimi paryzole.”

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Jakosi szudera

Jak padze deszcz i co chwile przeganio nas jakosi szudera, to ni ma dobre szmatłać sie po mieście. Sóm jednakowóż tacy co se s tego nic nie robióm, jak akurat majóm w planie ukozać sie tustelokóm i ś nimi porzóndzić. W zeszłóm sobotem giszało jak s cebra, ale rozmajci cieszyniocy se s tego nic nie robili, bo akurat prziszła im chynć tustelokóm zachwolać nasze cieszyński śledziowe kanapki. Moc było takich co mieli na nie szmak i trzeja był nad nimi dzierżeć paryzole, coby na nich nie padało i we spokoju mógli tyn darmowy poczynstunek skrónżać .Przi tym jedzyniu dało sie słyszeć, jak ludzie w tym deszczu prawili, co trzeja by było w naszym mieście zrychtować, coby sie ludzióm lepszyj żyło. Jedni prawili, coby nasz basyn był rychlij otwiyrany, bo lato przichodzi pryndzyj, drudzy by chcieli, coby Olze na nowo oporzóndzić i na brzegach postawić rozmajte legiery, a eszcze insi chcieliby dlo starek i starzików odewrzić takóm chałupe w kierej by se łóni mógli za dnia s kamratami pofulać. Byli też tacy, keirzi fluchcili na napad obdarowanio Cieszyna nowym szpatnym herbym, ale też moc ludzi mamrało, że ni majóm kaj postawić swojigo auta. Je to dycki procne, coby wszeckim dogodzić, bo jak jedyn chce po mieście chodzić pieszki to drugi chciołby jeździć na kole, a trzeci autym, abo aji s karami. Cieszyn je przeca taki mały, że wszyndzi idzie dónś pieszki, a s dziedzin je możność przijechać żółtym autobusym, abo cugym i nie robić żodnymu ostudy ze swoim autym. Bo jesi uż gdosi przijedzie autym to i tak nieskorzij szmatle sie po mieście pieszki.

Mini słownik:
padze-pada,
szudera-ulewa,
szmatlać-spacerować,
napad-pomysł,
porzóndzić-pogadać,
giszało-lało,
skrónżać- łapczywie zjeść,
prawili-mówili,
rychlij-szybciej,
kamrat-przyjaciel,
pofulać-poplotkować,
fluchcić-narzekać,
mamrać-marudzić,
dycki-zawsze,
procne-trudne,
cug-pociąg,
ostuda-kłopot,

Tóż miyjcie sie wszedcy dobrze i wiesołego popióntku