CO TYDZIYŃ PO NASZYMU: Łod czornych auspufów dzierżcie sie dycki z dalekabyć zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Dzisio bydzie kapke o ekologije, bo trzeja to przeca roz a dobrze tustelokóm wyłoślić. Jak wiatru ni ma i kapke mar-znie to w całym Cieszynie smerdzi jak diasi. Je to jakisi dziwoki, bo tych starych chałup w Cieszynie przeca nie przibyło w kierych sie hajcowało, a nikierzi prawióm sie topiło w rozmajtych kaflokach. Biere sie to isto s tego, że ludzie topióm wszeckim co im przidzie pod rynke i skyrs tego nieskorzij ni ma czym wydychać. Kiejsi też ludzie ciepali pod blache to, co pośmiatali na delinach, ale ty śmietki były naprowde ekologiczne. Bo przeca jak na ziym cosi spadło to nie był to plastikowy saczek, a yno papiórzano dita. Na dziedzinach żodyn ni mioł kiśni na śmieci, bo chyboł wszecko pod blache i to pieknie zgorało. Wóngiel też był jakisi lepszy i wubec tego nie smerdziało jak sie prziłożyło nim pod blache. Aji stare bótki skórzane zgorały jak sie patrzi, bo miały też ze skóry zole. Dzisio na takim bótku wszecko je sztuczne i aji sznórówki sóm zrobióne s jakigosi ekstra sztofu. Prowdziwne sóm teraz yno strómy w lesie, bo ty co rosnóm wedla cesty, przyndzióne sóm bynzynóm i na zicher jak prziszło by nimi hajcować pod blachóm, to by też smerdziało. Dwa tydnie tymu do tej ekologiji dołożyli sie też szoferzi, kierzi ze swojimi rajdowymi auciskami robili przegazówke na rynku w Cieszynie. Kiery na to prziszeł, coby każdego roku przed zimóm zganiać tych rajdziorzi na rynek i kozać ludzióm wóniać to co wydychajóm auspufy jejich aut, to je moc zimawe. Zustało sie mi yno prziglóndać, jak tustelocy zamias uciekać do chałup i fest pozawiyrać łokna stoli na rynku i wdychali do pluc tyn ekologiczny luft. Mini słownik: kapke- trochę, wyłoślić-wytłumaczyć, smerdzi-śmierdzi, topiło-paliło, skyrs- z powodu, nieskorzij-później, pod blache-do pieca, deliny-podłoga, kiśnia-skrzynia, zola-podeszwa, sztof-materiał, strómy-drzewa, wedla-obok, cesta-droga, na zicher-na pewno, wóniać-wąchać, auspuf-rura wydechowa, luft-powietrze Tóż miyjcie sie wszedcy dobrze i wiesiołego popióntku
|
reklama
|
Dodaj komentarz