CO TYDZIYŃ PO NASZYMU: Ni ma tydnia, coby sie cosi w Cieszynie nie wydarziło

”...majóm nowego staroste...”

”...nejwiynkszy kszeft w Cieszynie...”

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Jakisi Amerykón
Zeszły tydziyń prasknył cały miech s wiecami, ło kierych trzeja bydzie cosi naprowde napisać. Piyrsze to ciepła mi sie na łoczy ulica Chopina na kierej w taki pieknej chałupie s nomerym szesnos, wstyrczóno je na dachu amerykańsko fana. Chałupa je tak piekno, że jak żech sie na nie podziwoł to zdało mi sie, że w ni urzynduje jakisi prowdziwy amerykón, kiery rozdowo tustelokóm powolyni na wjechani do Ameryki. Skyrs czymu na jeji dachu wiater dyrbie tóm amerykańskóm fanóm tego żodyn ni wiy i sie mi zdo, że tyn kiery tam miyszko zrobił to ludzióm dlo szpasu. Drugo wiec, kiero cieszynioków dopadła, to je to, że od wtorku majóm nowego staroste, kiery prziszeł do urzyndu za tego, kiery łostatni sztyry roki prugowoł też cosi dlo tusteloków dobrego zrobić. Isto jednakowóż dlo nich było tego małoś nie wiela i nie zustoł wybrany do becyrku na delsze roki. Zaś we sztwortek odewrzity zustoł tyn nejwiynkszy kszeft w Cieszynie, kiery nie wiym czymu jakómsi galeryjóm mianujóm. Jakosi sie wszecki dwiyrze obstoły, bo ta nowoczesnoś mo to do siebie, że ty dwiyrze dzisio ni majóm bantów i przi takim wypuczu nie idzie ich wytargać s futryn. Tuselocy wymiytli s półek co sie yno dało i szło aji uwidzieć jak ludzie smykali po dwa telewizory, bo isto dóma na szranku uż mieli przirychtowane stare kiśnie do wyciepanio. Jak to rukło to isto mało gdo spozdrził, że chybio tam eszcze moc kszeftów, bo tam kaj miały być ty nowe, przirazili do ścianów rozmajte wymalowane papyndekle. Isto za moc to najyńci kosztuje i kszefciorze, kierzi poradzóm rachować pokozali im posdrzedni palec.

Mini słownik: prasknył-pękł wieca-rzeczy, wstyrczóno-wetknięta, fana-flaga, podziwoł-popatrzył, powolyni-pozwolenie skyrs-z powodu, dyrbie-trzepie, szpas-żart, becyrk-powiat, odewrzity-otwarty, banty-zawiasy, wypucz-tłok, szrank-komoda, kiśnia-pudło, wyciepać-wyrzucić, rukło-uderzyło, spozdrził-zobaczył, przyrazili-przymocowali, papyndekiel-tektura, kszefciorz-handlarz postrzedni- środkowy,

Tóż mjyjcie sie wszedcy dobrze i wiesiołego popióntku