CO TYDZIEŃ PO NASZYMU: Wieszać na płachcie swój gzycht, to ni ma nigdy dobre

Uż my sie wybrali i skyrs tego skludzóne zustały wszecki płachty na kierych rozmajci tustelocy ukazowali swoji gzychty. Tak dłógo łóne wisiały, że isto wszedcy tustelocy przez piyńć roków nie zapómnóm na kierego postawili krziżyk, a kierymu pokozali psinco. Ty hoki w murach jednakowóż dycki bydóm przidajne i roz dwa na nich zawieszóne zustały insze chwolidła. Nie wiym czy tustelocy kierzi sie plyntóm po cestach dycki dźwigajóm łoczy do góry, ale to wieszani je isto łacne, bo wisi w lufcie i żodnymu nie zawadzo. Kaj yno gdo może to wieszo rozmajte pieróństwa z kierych sie idzie wywiedzieć o rozmajtych wiecach, kiere bydóm nieskorzij odgrywane w naszym tyjaterze. Tak czy inakszyj kapke bydymy mieli wytchniynio do prziszłego roku, w kierym to zaś insi bydóm na tych plachtach sie wieszać i namowiać nas, coby wedla nich na wyborczej kartce cosi naszkryfać. Isto uż od dzisia rezerwujóm se ty szruby s hokami na kierych za rok bydóm wisieć płachty s jejimi gzychtami. Jo bych im doradzoł, coby na podrugi ty plachy se kansi do szranku schowali, bo czas tak wartko żynie, że po poru rokach bydóm se mógli zaś to powiesić i na tym kapke prziszporujóm. Przeca fórt widzymy ty same gsychty, kiere jak uż roz skosztowały leki roboty to sie im zdo, że tak bydzie dycki. Przi plyntaniu sie po ceście fórt idzie cosi zaimawego spozdrzić. Zeszły tydziyń w pióntek, żech uwidzioł dwóch policajtów, kierzi jakosi inakszyj wyglódali niż ci, co normalnie chodzóm po cestach. Jedyn mioł na pagónie dwie sztrajfki i trzi gwiozdki, a drugi dwie sztrajfki i jednóm gwiozdke i nie pasowali mi jakosi do tej cesty.

Mini słownik: skyrs- z powodu, skludzili-uprzątnęli, gzycht-twarz, psinco-nic,figa, przidajne-przydatne, chwolidło-reklama, cesta-droga, dycki-zawsze, wieca-rzeczy, nieskorzij-później, płachta-prześcieradło, wedla-obok, szrank- komoda, żynie-gna, prziszporujóm-zaoszczędzą, fórt-wciąż, cesta-droga, zaimawe-interesujące, sztrajfka-tasiemka,

Tóż miyjcie sie wszedcy dobrze i wiesiołego popióntku