CO TYDZIYN PO NASZYMU: Nawszczywić kierchów to je dycki procno wiec

”...zbiyrali pinióndze...”

Kapke wolnego łod roboty podarziło sie tustelokóm łapnóć, tóż też kiery yno móg to gzuł na kierchów. Latoś czas był dobry, bo nie padało ani nie duchoł wiater i skyrs tego szło uwidzieć rewije mody na wszeckich kierchowach. Paniczki nie wiedziały w co sie oblyc, bo w kalyndorzu uż mielimy jesiyń, a s nieba przigrzywało jak w lecie. Tóż też szło uwidzieć tusteloków obleczónych po latowymu, po zimowymu i aji kapke tak i kapke inakszyj. Je to dycki nejgorszy czas dlo naszych paniczek, skyrs tego, że nie wiedzóm w co sie wysztrychnóć. Bo letni szaty i spodki uż do odmaryje były poukludzane, kaj dycki kapke sie to popuczy i niepieknie wygłondo jak sie to nieskrzij oblecze. Trzeja by to zaś spadki biglować, a to potrzebuje dycki ekstra czasu, kierego każdej babie dziynnie fórt chybio. Chłopi majóm s oblyczkóm miynij ostudy, bo fórt chodzóm w ancugach i je im to jedno jaki przidzie czas. Jak by baji padało, to dzisio mo każdy w taszce skłodany paryzol, kiery łod deszcza dycki wszeckich chróni. Na tym nejwiynkszym cieszyńskim kierchowie szło uwidzieć ludzi, kierzi tak jak w insze roki, zbiyrali pinióndze na wyrychtowani potłóczónych i odrzitych grobowych pómników. Za porem roków tego robić uż nie bydzie trzeja, bo prziszła moda na polyni i chowani naszych przibuznych w murku, w kierym je moc małych szranków, do kierych idzie wrazić żbónek ze spolónym tustelokym. Czas fórt żynie do przodku i dycki przichodzi jakosi inszo moda, kierej starki i starzicy nie wszymajóm, a młodziocy se myślóm, że bydóm żyli wiecznie i ominie ich chowani na kierchowie.

Mini słownik: kapke-trochę, podarziło-udało się, gzuł-pędził, czas-pogoda, kierchów-cmentarz, skyrs-z powodu, obleczóny-ubrany, dycki-wciąż, wysztrychnóć-wystroić, szaty-sukienki, odmaryja-szafa, popuczy-pomnie, nieskorzij-później, biglować-prasować, fórt-ciągle, ancug-ubranie, odrzity-odrapany, przibuzny-krewny, szrank-szafka, żbónek-dzbanek, starka-babcia, starzik-dziadek

Tóż miyjcie sie wszedcy dobrze i wiesiołego popióntku