CO TYDZIYŃ PO NASZYMU: Dziso prziszeł taki czas, że nie idzie sie podle wiatru skapnoć, jako bydzie jutro pogoda

”...po zrychtowanych cestach...”

”...wielko kostka...”

Na pieknóm pogode prawi sie u nas, że prziszeł piekny czas i tak sie nóm zeszły tygodziyń zdowało, a tu naroz wszecko sie zwyrtło. Uż nikierzi zaczli aji gzuć po cestach autami bez dachów i zdało sie, że uż tak zustanie. Kierysi jednakowóż chcioł inakszyj i zaczło fest s nieba giszeć, coby przeca chocioż kapke ty flancki sie zazielyniły. Człowiek to je taki zwiyrze, że wszecko wydzier-ży, a nikierzi prawióm, że wydzier-ży wiyncyj niż wielki kóń. Jakosi sie tyn piekny czas przidoł tym co rozgrzebali w mieście nasze cesty. I do podziwu, bo idzie im to latoś wartko i widać, że za porem dni bydymy zaś drepsić po zrychtowanych cestach. Kapke inakszyj niż to było kiejsi, bo nie zustały wszecki cesty naroz rozgrzebane i możne skyrs tego po kónsku i bez utropy dlo Cieszynioków podarzi sie to wartko zrychtować. Nikierzi sie yno dziwujóm, że tych ruł nie wrazili do ziymi piyńć roków tymu jak robili s kanałami. Przeca byłoby to przi jednej robocie i marasu na mieście było by mjynij. Rozmyślóm skyrs czymu tak moc razy nie idzie kapke porozmyślać do przodku, ale dycki nieskorzij wszedcy sóm nejmóndrzejsi. Tyn tydziyń eszcze trefiło sie nóm “Kino na Granicy” s kierym też isto miasto mo kapke ostudy. Nejsrandowniejszo je jednakowóż ta jejich reklama, abo lepszyj rzeknóć chwolidło, kiere stoji na rynku. Je to tako wielko kostka na kierej namalowane sóm rozmajte karciane symbole. Tak rozmyślóm co łóne s kinym majóm społecznego i nic do czepani mi nie zaklupało. Czakóm jyny, czy kierysi bydzie mioł taki napad i postawi na moście wielkóm płachte i zacznie naprowde ty filmy pokazować tustelokóm na prowdziwej granicy.

Mini słownik: zwyrtło-obróciło, cesta-droga, fest-bardzo, giszeć-lać, flancki-rozsada, do podziwu-chwalebnie, drepsić-spacerować, skyrs-z powodu, wrazć-włożyć, maraz-nieczystości, kapke-trochę, dycki-zawsze, nieskorzij-później, ostuda-kłopot, czepań-głowa, napad-pomysł,

Tóż miyjcie sie wszedcy dobrze i wiesiołego popióntku