CO TYDZIYŃ PO NASZYMU: Dzisio rozmajto trucina góni w lufcie, bo tusteloki bele czym hajcujóm

Zaś je w Cieszynie jakosi nowoś w kieróm isto nie bydzie tak leko uwierzić. Na tym naszym staro-nowym cieszyńskim banhofie uż isto wszecko było, a roz aji tam był yno maraz, ździorba i charapuci. Teraz mómy tam aji muzeum łod drukorzi, kierzi se tam nalyźli plac. Co tam bydóm robić tego nie wiem, ale przez szybem widać, że uż tam stojóm jakisi gesztele. Skyrs czymu łoni sie tam wziyli tego też nie wiym, ale kierysi mi prawił, że ta jejich staro chałupa na Głymboki, mo być na nowo zrychtowno. Jo mogym jim yno współczuć, bo ty wszecki gesztele, róndajzy i rozmajte staroświecki maszyny do drukowanio były kiejsi strasznie ciynżki, skyrs tego że wszecko było zieleźne. Dzisio sie to wszecko zwyrtło i mómy yno wszyndzi plastik.Tak sie go moc namnożyło, że żodyn se go nie woży i jak yno mo przileżytoś, to kaj yno może to go wyciepuje. W telewizorze pokazuóm jak aji ryby w morzu se ś nim ni mogom dać rady. Nikiere to tyn plastik żeróm, a nieskorzij skyrs tego zdychaóm. Aji taki zdało by sie wielki wieloryb jak sie tego plastiku nażere, to mo ś nim tela łostudy, że ni może go strowić i też moc razy widać nieskorzij, jak pływo zdechniony do góry bachórzym. Drukorze dzisio majóm moc lekciyj, bo litery uż nie sóm łołowiane i sie ś nimi nie trujóm. Ale zaś za to farby, kierymi sie drukuje, jak im nadbydzie to ni ma ji kaj wyciepać. Kiejsi tusteloki bele co wyciepowały do ziymi, bo nie była to trucina i każdy chrobok poradził to strowić, a ku tymu eszcze rozmajtej trowie to szmakowało. I tak sie nóm dzisio podarziło drukorzi pożynić s trowóm, kieróm kormióm podtrute chroboki.

Mini słownk: banhof-dworzec, maraz-brud, ździorba- graty, charapuci-różnorakie graty, nalyźli znaleźli, gesztele-urządzenia, róndajzy-mechanizmy, skyrs-z powodu, zieleźne-żelazne, nieskorzij-później, bachórz-brzuch, chrobok-robak, kaj-gdzie, wyciepać-wyrzucić

Tóż miyjcie sie wszedcy dobrze i wiesiołego popióntku