CO TYDZIYŃ PO NASZYMU: Dziecka se dycki znóndóm zabawe jak nie sóm we szkole

...moc rechtorek...”

”...szpacyrowały po rynku...”

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Nie bolały klepeta

Trzeja by isto też kapke cosi napisać o rechtorach, kierzi naroz sie szprajcji i uż nie chcóm za taki małe pinióndze uczyć naszych dziecek. Czas akurat mómy piekny i szło w pyndziałek uwidzieć moc rechtorek, jak se szpacyrowły po cieszyńskim rynku, a nikiere grzoły na ławkach swoji zadki. Rechtorów tam jakosi nie było widać, isto skyrs tego, że wahowali swoji szkoły, coby żodne baraby tam sie nie prziplyntały. Dycki to je przeca tak, że jak kansi dwiyrze sóm odewrzite, to zaroz sie taki nóndzie co tam wlezie i cosi zbiere. Tak rozmyślóm, coby to było jakby zaczło padać. To isto sie jednakowóż nie stanie, bo na zicher łońi s ponbóczkym sie dorzóndzili i czas bydóm mieć przez porem dni isto piekny i słóńca na zicher im nie chybi. Nikiere dziecka nie wiedziały co ze sebóm zrobić, bo muszóm być wahowane, zaś ty wyrośnióne plyntały sie po cestach. Moc też było takich, kiere miyndzy blokami jeździły na wrotkach, grały w lajdy, a reszta rzgała do telefónów, bo dzisio dziecka yno to majóm we starości. Kiejsi jak na placach przed chałupami stoły sztangi do klupanio tepichów, to dziecek przi nich dziynnie było pełno. Jedni sie na nich wieszali, zaś insi cióngli ich za klepeta i krawalu ze śmiychym fórt było przi tym tela, że nikiedy nie szło sie ani ze sebóm dorzóndzić. Uciechy eszcze było moc przi graniu w klasy i skokaniu przez nacióngnióne porwózki. Jakosi żodnych dziecek hańdownij nie bolały klepeta, isto skyrs tego, że nie były taki hrube i snadno im było hópkać przez ty porwózki i wisieć dłógo na tej tepichowej sztandze..

Mini słownik: kapke-trochę, rechtór-nauczyciel, szprajcji-opierali się, czas-pogoda, skyrs-z powodu, wahowali-pilnowali, baraba-włóczęga, dycki-ciągle, kansi-gdzieś, na zicher- na pewno, dorzóndzić-dogadać, cesta-droga, lajdy-zabawa dziecięca, we starości-w zainteresowaniu, klupać-trzepać, hańdownij-dawniej, klepeta-nogi, hruby-gruby, snadno-łatwo, sztanga-drąg żelazny.

Tóż miyjcie sie wszedcy dobrze i wiesiołego popióntku