CO TYDZIYŃ PO NASZYMU: Dzisio to je wielko uciecha kopnóć sie starym landauerymbyć zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Ni ma tydnia, coby gdosi cosi zaimawego nie wynochwił tustelokom, coby łóni mieli fórt jakómsi ucieche. Zeszłóm niedzielem szło uwidzieć na rynku rozmajte stare landauery, kiere nieskorzij zaczły jeździć po mieście, coby wygrać jakómsi modróm bandle Olzy. Szło sie tam nadziwać na rozmajte wyglancowane auciska, kiere chocioż uż miały swoji młode roki po zadku, to eszcze bez żodnej kurbli zapolały swoji motory. Były tam przepiynknej urody nasze Syryny, Maluchy, Kancioki i aji dwa amerykański krónżowniki cest. Jak sie tak człowiek tymu poprziglóndoł, to ni móg uwierzić, że moc ludzi kiejsi poradziło takimi auciskami jeździć po naszych cestach. Ni miało to przeca żodnej klimatyzacyji i jak prziszeł latowy hyc to trzeja było mieć wszecki łokna odewrzite. Nikiere auciska miały rozmajte dziury w dachu, przez kiere do posrzodka też lecioł świyży luft. Czy łón był taki świyży tego nie wiym, ale na zicher nie było w nim tego rozmajtego pieróństwa co mo w siebie dzisio. Pieknie stoły wszecki na rynku, jedyn wedla drugigo, tak samo jak sztyrycet roków tymu mógły auta stoć łod każdego. Żodyn nie płacił za to stoci i skyrs tego szło go postawić kaj yno sie kómu uzdało. Wszedcy chodzili pieszki i żodyn nie fluchcił, ani nie narzykoł, bo wiedzieli, że bydóm zdrowsi jak sie przyndóm kónsek po swojich klepetach. Kiejsi szło do każdej dziedziny dojechać autobusym abo cugym i jakosi żodnego nigdy nie ubyło. Dzisio to aji po porem żómłów jeżdżóm rozmajte błozny swojimi auciskami, bo chcóm szanować swoji klepeta, kiere na kóniec tydnia muszóm wydzierżeć rozmajte joggingi i nordic wolkingi. Mini słownik: gdosi-ktoś, wynochwił-wymyślił, landauer-pojazd, bandla-wstęga, kurbla-korba, kanciok-Fiat 125p, cesta-droga, hyc-gorąc, odewrzite-otwarte, luft-powietrze, na zcher-na pewno, wedla-obok, klepeta-nogi, skyrs- z powodu, kaj-gdzie, fluchcić-narzekać, dziedzina-wieś, żymła-bułka, klepeta-nogi, wydzierżeć-wytrzymać. Tóż miyjcie sie wszedcy dobrze i wiesiołego popióntku
|
reklama
|
Dodaj komentarz