CO TYDZIYŃ PO NASZYMU: Zielazo mo zieleźnóm barwe i sie go nie sztrajchujebyć zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Dzisio po trzeci roz, bydzie ło naszej studni Trzóch Braci. Kiejsi kierysi rzeknył, że do trzóch razy sztuka, a jak sie to nie podarzi to trzeja dać se pokuj i wiyncyj nie żgać do guwna, bo eszcze bydzie delij smerdziało. Mało isto dzisio gdo wiy, że przeszło dziesiyńć roków tymu, miastowe urzyndniki s rotuza wyszpekulyrowali, że trzeja bydzie te studnie na nowo posztrajchować. Ciynżko je dzisio nónś tego, co mioł taki napad, coby sztrajchnóć to zielónkawóm barwóm, ale na iste prziklepoł to tyn, co w tych rokach regirowoł miastym. Je przeca we świecie taki zwyk, że stare wieca sie nie poprawio, yno sie to glancuje i kartaczuje, coby ci co przidóm po nas mógli zeprzić łoczy na tym, co kiejsi zrychtowali nasi starzicy. Mało też isto dzisio gdo wiy, że tóm całóm altankem, kiero tam nad tóm studnióm stoji odloli ze zielaza w trzyniecki hucie i była óna cało czorno. I tak to miało zustać, bo trdycyje sie nie poprawio. Dycki jednakowóż kierysi sie u nas nóndzie, kiery je móndrzejszy. I prziszeł dzisio uż tyn czas, coby to łodrzić do zielaza i niechać to taki, jaki to kiejsi było, bo przeca odlote zielazo ni mo zielónej barwy. To ni ma wszecko, bo tyn napad, coby te studnie posztrajchować skuplowany zustoł eszcze s inkszym unowocześniynim. Ta prowdziwno woda, kiero tam w tej studni bulkała, co jakisi czas zielyniała i coby s tym nie było łostudy puścili do ni wode s waserlajtungu. Nejprzód do ni jednokowóż wrazili plastikowom rułe, przez kieróm do kanału zustała puszczóno, a nieskorzij wykidali na to wszecko kary betónu, coby łóna uż na wyrch nie wylazła. To ni ma wszecko i za tydziyń przirychtujcie sie na delsze studziynne atrakcyje. Mini słownik: kierysi- ktoś, rzeknył –powiedział, nie podarzi-nie uda się, rotuz-ratusz, wyszpekulyrowali-wydumali, posztrajchować-pomalować, napad-pomysł, regirować-kierować, zwyk-zwyczaj, glancować-czyścić, kartaczować-szczotkować, zrychtowali- wykonali, dycki-zawsze, skuplowany-połączony, bulkać-bulgotać, waserlajtung-przewód wodociągowy, kary-taczki, przirychtować-przygotować. Tóż miyjcie sie wszedcy dobrze i wiesiołego popióntku
|
reklama
|
Dodaj komentarz