CO TYDZIŃ PO NASZYMU: Rotuzowi majóm dycki problymy, coby wszeckim dogodzić

”...ło wiela za moc...”

”...TU STELA"

Kierysi naporynczył

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Jakosi sie nóm nie podarziła ta pogoda na świyntowani tej rocznicy stu roków przegnanio Austryjoków s naszej ziymi. Giszało s nieba jak diasi i skyrs tego nie wiela tusteloków wylazło ze swojich chałup, coby obezdrzić to, co przirychtowali dlo nich rotuzowi. Sie mi zdo, że delij ludzie spamiyntajóm tyn hałdamasz s przestawianim Cieszyna ło sto roków do zadku, bo trwało to pore dni i szło sie nadziwać na ty szyldy, kiere miały ruski bukfy. Możne to świyntowani tustelocy spamiyntajów delij skyrs tego, że kosztowało to, ło wiela za moc, niż to było worte. Dzisio je tak, że wszecko co rotuz kupuje za nasze pinióndze, idzie sie zwiedzieć aji w internecie i nieskorzij każdy szkrobie sie po czepani, czy to stoło za to. Na rynku uż ni ma po tym hałdamaszu żodnego śladu i tak jak to było rychlij, yno gołymbie świnióm po “Florianie”, bo żodyn do dzisia nie prziszeł na to, jako ich przegnać s tego rynku na dziedzinem. Dycki to je tak, że jak sie gdosi roztopyrczy na rynku ze swojimi budami, abo inszym harapucim, to na tyn czas ty boroki golymbie muszóm se nónś plac na jakimsi dachu. Nejraczyj dycki siedzóm na COK-u, bo isto jim to kierysi naporynczył, coby yno jedyn dach był zaświnióny. Możne, że tyn dach je zrobióny ze szpecyjalnego plechu, kiery zdzierży to jejich srani i nie zar-zowi. Tak było zeszły tydziyń, jak ze swojimi budami rozpostrziło sie stowarzyszyni osób, kiere same nie poradzóm żyć i fórt potrzebujóm łod inkszych pumocy. Piykli tam placki ze zimioków i reklamowali sie: ”My sóm stela i ziymioków mómy wiela”. Tak samo jak łóńskigo roku przepómnieli napisać TU STELA.

Mini słownik: podarziła-udała, przegnanio-przepędzenia, giszy-pada, skyrs- z powodu, obezdrzić- obejrzeć, delij-dłużej, hałdamasz-zabawa, zakiel-w tym czasie, nadziwać-napatrzeć, nieskorzij-później, czepań-głowa, świnióm-brudzą, prziszeł na to- miał pomysł, dziedzina-wieś, dycki-ciągle, roztopyrczy-rozciągnie, harapuci-graty, naporynczył-polecił, plech-blacha,

Tóż miyjcie sie wszedcy dobrze i wiesiołego popióntku