CO TYDZIYŃ PO NASZYMU: Dycki w kinie ludzie mogóm sie curiknóć o moc roków i to ni ma ostuda

”...jakisi ruski miasto...”

”...prziwalili okróngłóm tabulke"

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Pod laubami

Isto sie wszecki nasze starki i starzicy na kierchowie w grobach przewracajóm, jak sie na to dziwajóm co sie dzisio robi s naszym miastym. Żodnymu sie isto nie śniło, coby kierysi prziszeł na to, aby przerobić Cieszyn na jakisi ruski miasto. Ale możne, że je to dore dlo młodzioków, kierzi se myślóm, że tak dycki było jako je dzisio. Co inszego je czytać ło tym w ksiónżkach, abo widzieć w kinie, a co inszego sposdrzić to naprowde. A jak sie tak naprode przizdrzić tym szyldóm na kszeftach, to sie nic nie pominiało. Kiejsi pisali po rusku i jidisz i też wszedcy nie poradzili to poczytać, a dzisio pisane je na każdym szyldzie angielszczynóm i wypado na to samo. Je to moc zaimwe, tak sie noroz nónś sto roków do zadku i prógować rozmyślać jako to kiejsi było. Na zicher nie mieli ludziska staranio ło żodnóm ekologije, bo po cestach i aji po naszym rynku kónie cióngły wozy, a tyn nasz cieszyński tramwaj co jeździł po glajzach, też był na sztróm. Isto jak mar-zło to sie yno s kuminów kapke kurziło i żodyn se nie wszymoł, że to kómusikej na pluca bydzie szkodzić. Tako sie s tym zrobiła sranda, że w łoknach nikierych kszeftów, kiere przechrzcili na tabacznoju lawoczke przirażóny je plakat łod jednego panoczka, kiery ciśnie sie do regirowanio powiatym. Zaś pod laubami na ścianie wedla dwiyrzi łod jednego biura, kaj nikiedy idzie porzóndzić s wybrańcym narodu, prziwalili okróngłóm tabulke. Ś ni idzie sie wywiedzieć, że jesi jakisi chłop bydzie mioł chynć sie dorzóndzić s jakómsi paniczkóm, to u nich nie trzeja bydzie to załatwić na cały dziyń, yno możne styknie aji na jednóm godzine.

Mini słownik: starka-babcia, starzik-dziadek, dziwajóm-patrzą, przyść na to- wpaść na to, dycki-ciągle, spozdrzić-zobaczyć, przizdrzić-przyjrzeć, poradzioł-potrafił, kszeft-sklep, na zicher-na pewno, zaimawe-interesujące, nónś-znaleźć, sztróm-prąd, kapke-trochę, wszymoł-myślał, glajzy-tory, sranda-uciecha, lauby-podcienie, wedla-obok, kaj- gdzie, porzóndzić-pogadać, dwiyrze-drzwi

Tóż miyjcie sie wszedcy dobrzei wiesiołego popióntku