CO TYDZYŃ PO NASZYMU: Fórt na kszeftach sóm szyldy, na kierych nie idzie sie wyznaćTak my sóm rozegnani tym pokraczowanim po naszym Cieszynie, że trzeja by było dzisio rzeknóć kaj my tak naprowde sóm. A sóm my na Głymboki przi nomerze pińdziesiónt piyńć, kaj znaszeł se plac kszeft s wiecami, kiere pasujóm do wszeckich łokiyn. Przedowajóm też tam forchangi, kiere jak pisze za aslagóm poradzóm wóm ustrzignóć na miare, a potym aji obrómbić. Nejbardziyj jednakowóż zaimawo je tam tak szuro powieszono na ścianie tabulka na kierej pisze”poniżamy ceny”. Mie sie zawsze zdowało, że poniżać to może yno jedyn drugigo, a tu naroz widzym, że cyny też majóm swój honor i idzie ś nimi sponiewiyrać. Kapke dalij trefiymy zaś na kszeft s oblyczkóm dlo paniczek i chłopów, a idzie na to prziś jak do nich zozdrzymy s bliska przez auslage. Kszeft je doś wielki i nie wim skyrs czymu swoji miano “fendy” mo napisane małymi literami. Nie poradzym go przełożyć na polski, bo isto zustało tak wyszpekulyrowane, coby trzeja było wlyś tam do postrzodka i spytać sie s czym sie to jy. Dwiyrze dalij uż nie bydymy mieć taki ostudy s mianym kszeftu i przidymy s tym roz dwa do porzóndku, bo łón mianuje sie “butuś”. Też to majóm małymi literami napisane i aż sie bojym pokroczyć dalij i uwidzieć, że trzeci kszeft, tak jak jego sómsiedzi też zmiynio polskóm gramatykem. Tak czy inakszyj nie trzeja moc rozmyślać czym łóni tam kszefcóm, bo tyn “butuś” mo na zicher miano łod bódków dlo małych dziecek. Wedla tego”butusia” kierysi rychtuje se nowy kszeft i uż pyto tustoloków, coby go nawszczewili jak go zrychtuje. Co jednakowóż tam bydzie przedowoł tego tymu isto nie napisoł, coby nie płoszyć konkuryncyji. Mini słownik: pokraczować-spacerować, rzeknóć-powiedzieć, kaj-gdzie, kszeft-sklep, wieca-rzeczy, forchangi-firanki, auslaga-wystawa, ustrzygnóć-uciąć, zaimawo-interesująca, szuro-krzywo, zozdrzić-zajrzeć, skyrs-dlaczego, miano-nazwa, dwiyrze-drzwi, ostuda-kłopot, uwidzieć-zobaczyć, zicher-pewne, wedla-obok, nawszczewić-odwiedzić Tóż miyjcie sie wszedcy dobrze i wiesiołego popiontku
|
reklama
|
Dodaj komentarz