Szpacyrkym po Cieszynie
“Gdo sie za swoj jynzyk wstydzi
takim niech sie każdy brzidzi”
Po cimoku
Dzisio podziwómy sie na auslage i na dwiyrze w chałupie na Głymboki nomero 45, kiere sóm tak czymsi oblepióne,że nic do postrzodka nie widać. Na sztrómie na zicher nie zaszprujóm, bo przeca nie siedzóm tam po cimoku, ale isto przi rożniónym świetle. Jak tak bliżyj ku nim podyndymy, to uwidzymy, że je to biuro, kiere doradzi nóm jako i kiedy pojechać na orlap. Widać, że tustelocy zbogatli i jeżdżóm kaj sie yno do i też tymu to biuro robi aże s szejścióma inszymi kszeftami do kupy, kiere poradzóm nas posłać kaj se yno chcymy. Rajzować po świecie dzisio każdy może, bo paszporty majóm dóma, a dziynka tymu, że uż żodnej szlogi na europejskich cestach ni ma, to jak naburzymy bynziny do baku w Cieszynie to stanymy dziepro aże kansi w Paryżu. Posunióni w rokach tustelocy isto eszcze pamiyntajóm jak na mostach w Cieszynie trzeja było stoć aji pore godzin, coby być puszczonym do braci Czechów. Kiejsi yno na przepustke szło wartko sie dostać na Czechy przez tyn mostek wedla “Juweni”, bo nie było moc tych ludzi, coby mieli w kapsie taki powolyni. Dwiyrze dalij je kszeft, kiery isto też kszefci oblyczkóm, ale na to mogymy yno prziś, jak zoglóndnymy za jejich auslage. Wisi tam oblyczka na manekinach, kiere majom jakisijej skośne łoczy, a jedna mo aji przewieszonóm na ramiyniu żółtóm taszke. Tyn kszeft mianuje sie “OKY DOKY”, ale jako to przełożyć na polski tego dobrze ani nie wiy słownik, bo koże se wybrać aże trzi możności. Na Głymboki je to isto yno jedyn jedyny kszeft, kiery nimo ani słowa po polsku za auslagóm, a przi rónczce kiero prziszrubowano je do dwiyrzi pisze “pusch” po angielsku.
Mini słownik:
podziwómy-popatrzymy,
auslaga-wystawa,
dwiyrze-drzwi,
sztróm-prąd,
zaszporować-zaoszczędzić,
rożnióny-zapalony,
kansi-gdzieś,
kaj-gdzie,
kszeft-sklep,
rajzować-podróżować,
szloga-zapora,
naburzić-napełnić,
kiejsi-kiedyś,
wedla-obok,
kapsa-kieszeń,
auslaga-wystawa,
taszka-torba,
Tóż miyjcie sie wszedcy dobrze i wiesiołego popióntku
Dodaj komentarz