CO TYDZIYŃ PO NASZYMU: Dzisio sóm taki czasy,że jedny świynta zahoczujóm ło drugi

...w postrzodku przedowane som bótki

móndry Czech ze Zlina...

Siedzóm w klotkach

Patrziło by sie dzisio cosi ło Wielkanocy napisać, coby tustelocy zachycili, że łóna za dwa dni przidzie. Po Grómnicach we wszeckich kszeftach przeca idzie uwidzieć wszeli jaki maści zajónce, pofarbióne prowdziwe wajca, zawinióne we stanijolu upieczóne baranki, bónbóny co udowajóm wajca i aji sztuczne kucianki. Tóż jak uż ty świynta przidóm to ni ma to taki zocne, bo prawie dawa a pół miesiónca ze wszeckich strón do nas rzgali, coby kupować co popadnie. Kiejsi jak we kszewtach wszeckigo chybiało to aji szónka we świynta byla zocno, a dzisio każdy jóm mo we swoji szpajsce. S wajcami też je sumeryja skyrs tego, że baby nie wiedzóm jaki ty wajca majom kupować, bo jedny sóm łod kur kiere mogóm gónić po zogródce, a inksze łod takich co siedzóm w klotkach. Wajce je wajce i jak je świyże to mie to je jedno czy kura ś nim góniła po placu czy siedziała na gnioździe. Dzisio uż dómy tym kuróm pokuj, bo po Głymboki przed świyntami przeca kury nie gónióm i podziwómy sie na auslage pod nomerym pińdzesiónt jedyn. Je tam kszeft s bótkami dlo ludzi, kierzi majom dobre łoczy i przez auslage bez czytanio uwidzom, że w postrzodku sóm przedowane bótki. Kierysi czas, mieli też tam przilepiony za auslagóm plakat, kiery namowioł tusteloków do pojechanio tam kaj kiejsi jedyn taki móndry Czech ze Zlina co sie mianowoł Tomasz Bata postawił u nich nejwjynkszóm fabryke s bótkami. Nie wiym czy tam kiery pojechoł, ale jesi taki sie znaszeł to bydzie dzisio na zicher wiedzioł s jakigo sztofu zrobióne sóm w bótkach zole i krónfleki.

Mini słownik:
patrziło by-należało by,
zachycić-załapać,
kszeft-sklep,
wajco-jajko,
staniol-folia aluminiowa,
bónbon-cukierek,
kucianki-bazie,
zocne-cenne,
chybio-brakuje,
auslaga-wystawa,
kaj-gdzie,
postawił-wybudował ,
zola-podeszwa,
krónflek-obcas

Tóż miyjcie sie wszedcy dobrze i Wiesiołych Świónt Wielkanocnych