CO TYDZIYŃ PO NASZYMU: Ździorba abo charapuci to sóm taki wieca, kiere uż żodnymu nie sóm przidajne

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Wiela je godzin
Ta ulica Michejdy na prociw naszego tyjateru je naprowde piekno. Uż prawie wszecki chałupy przi ni sóm opucowane i cieszynioki nie muszóm sie za nie przed lufcorzami gańbić. Tak to uż je, że dycki jak człowiek szpacyruje po swojim mieście to ni mo czasu, coby dźwignoć łoczy do góry i chocioż na chwiliczkem sie zadzierżeć. Rozchodzi sie ło to, że dziynnie każdy gno do roboty, abo spadki żynie wartko na łobiod ku chałupie i ni mo kiedy rozmyślać ło tym, wedla kierej chałupy dzisio szpacyruje. Tóż też tymu, jak możne gdo to moji pisani poczyto przi niedzieliczce to w pyndziałek na zicher znóndzie se kapke czasu, coby zozdrzić na wszecki chałupy wedla kierych dziynnie sie przesmrodzo. Dzisio na raji je ta chałupa s nomerym dwija trzicet kiero je bardzo pieknie opucowano na rużowo. W ni mogymy trefić na kszeft ze starymi ździorbami, kiere dzisio wszedcy mianujóm antykami, a kapke dalij we dwiyrzach znaszeł se plac godziniosz, kiery sprawuje i przeduje rozmajte godzinki. Mómy teraz taki czasy, że dycki wszedcy muszóm wiedzieć wiela je godzin, bo abo idóm do roboty, abo śpiychajóm sie na randke ku dziełuchóm, a łóne nigdy ni majóm zwyku na chłapca dłógo czakać. Kiejsi ludzie tak sie nie śpiychali, bo przeważnie miyszkali na dziedzinach i do pola chodzili jako im pasowało. Jak zaś chcieli wiedzieć wiela je godzin to dziwali sie na wieże kościoła na kierej zawsze był zygor. Zaś dlo tych co nie poradzili sie poznać na zygorze to farorz wielkim zwónym zwonił na nabożyństwo, a jak kiery umrził to zwónił na tym mjynszym, co go kónajónczkym mianowali.

Mini słownik:
opucowane-otynkowane,
lufciorz-wczasowicz,
przidzierżeć –zatrzymać,
spadki- z powrotem,
żynie-gna,
wedla-obok,
na zicher- na pewno,
zozdrzić-zobaczyć,
źdzorba- graty,
kapke-trochę,
godziniorz-zegarmistrz,
znaszeł-znalazł,
dziedzina-wieś,
dziwali sie-patrzyli się,
poradził-potrafił,
farorz-ksiądz,

Tóż miyjcie sie wszedcy dobrze i wiesiołego popióntku