CO TYDZIYŃ PO NASZYMU: Na wyszczyrbiónych schodkach idzie roz dwa kopyrtnóć

Dzisio eszcze trzeja bydzie sie roz przizdrzić tej ulicy dra Kluckiego skyrs tego, że łóna je ganc podobno do ulicy Schodowej. Łobie majóm do kupy tela schódków, że szło by ś nich zrobić drugi taki hiszpański schódki, na jaki idzie trefić w Rzymie. Italiańcy zmianowali ich hiszpańskimi, a cieszyniocy musieli by też jakisi piekne miano dlo nich wyszpekulyrować. Na delsze schódki idzie też trefić na Hażlaski, ale łóne sóm tak szkaradne i pouszczyrbiane, że gańba by było ś nich zrobić jakómsi lufciorskóm atrakcyje. Chocioż gdo wiy, możne tako atrakcyja jako schódkowy tor przeszkód miała by wziyńci i szło by cosi na ni utarżyć. W Cieszynie momy sztyry ulice na kierych je moc schodków i na zicher snaszli by sie tacy co gnali by po nich na przedbiyżki. A jak by tak na wyrchu każdych tych schódkow stoła eszcze jako darek beczka brackigo piwa to by to była dziepro fajno cieszyńsko atrakcyja. Dzisio mómy taki czasy, że rozmajte gupoty ludzi sie dzierżóm i czasym małoś nie wiela potrzeja pokozać, coby łod ludzi wydrzić pinióndze s kapsy. Jak uż tak prziszlimy ku rzeczy o chodkach to nikierzi w Cieszynie fundli se winde, coby zaszporować na zolach i na plucach. Je tako jedna wielko chałupa na Głymboki w kierej uż porem roków tustelocy jeżdżóm windom yno skyrs tego coby se pojczać ksiónżke, abo możne tymu, coby sie yno przejechać. W Cieszynie po wojnie była yno jedna chałupa w kierej egzystowła winda, a wyglóndala łóna jak dróciany corek do kierogo strach było wlyś , a nieskorzij eszcze w nim jechać do wyrchu.

Mini słownik:
przizdrzić-przyjrzeć,
skyrs- z powodu,
zmianowali-nazwali,
szkaradne-brzydkie,
gańba-wstyd,
lufciorz-turysta,
utarżyć-zarobić,
na zicher-na pewno,
przedbiyżki-wyścigi,
dziepro-dopiero,
kapsa-kieszeń,
ku rzeczy-do tematu,
fundli-zainwestowali,
zola-podeszwa,
corek-klatka/zagródka,

Tóż miyjcie sie wszedcy dobrze i wiesiołego popióntku