Szpacyrkym po Cieszynie
“Gdo sie za swój jynzyk wstydzi
takim niech sie każdy brzidzi”
"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"
POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.
Coby sie naprościł
Zeszły tydziyń pisołech ło takim jednym strómie, kiery je tak szuro ogiynty, że widać to aże s daleka. Dzisio ciepnył sie mi na łoczy drugi ganc podobny stróm yno kapke mjynszy i bydym go mianowoł strómkym. Tyn stromek idzie uwidzieć na nejstarszej krziżowaczce w Cieszynie na kierej uż dłógi roki rożygajóm sie trzi barwy świateł, kiere poradzóm nóm wyłoślić czy mómy sie zastawić, czy walić durch przez cestem. Jako tyn stromek sie mianuje tego nie wiym, bo w zimie ni mo żodnych listków, a yno po tym strom idzie poznać. Nie wiym też czymu tak dłógo podarziło sie tymu krziwulcowi tam obstoć i żodyn nie kozoł go skantrzić, ale isto wszedcy co pod nim szpacyrujóm sóm mali i żodyn eszcze nie zaździoł czepaniom ło jego kónor. Łón też jako tyn jego przibuzny s ulice Moniuszki może sie wartko obalić jak naroz przidzie wielko szudera. Tak rozmyśóm, czy tego żodyn nie widzi, czy nima to kómu kozać, coby s tym zrobić porzóndek i nie ryzykować zdrowio tusteloków. Eszcze dzisio jak zawrzili tyn chdnik po drugi strónie cesty, skyrs tej budowy naszej ”Steli” to kolem niego szmatle się roz tela ludzi co kiejsi. Za socjalizmu egzystowala w naszym mieście Zieleń Miejska i na zicher taki szury strómek ni miołby szans sie obstoć delij uż jak ze dwa tydnie, bo podeprzili by go wartko jakimsi hrubym drzewianym kulikym, coby sie naprościł. Możne jak ganc legnie na trotuarze to sie gdosi przeca skapnie, że trzeja cosi s tym zrobić i tam posadzić nieogibacy chrost s zielónymi jegłami, kiere aji w zimie na nim by sie dzierżały.
Mini słownik:
stróm –drzewo,
ogiynty-zgięty,
ciepnył-rzucił,
kapke-trochę,
mianowoł-nazywał,
rożygać-zapalać,
walić durch-przejść przez,
cesta-droga,
obstoć-utrzymać,
przibuzny-krewny,
zoździoł-zahaczył,
obalić-przewrócić,
szudera-ulewa,
zawrzić-zamknąć,
kulik-kołek,
szury- krzywy,
nieogibacy- niegiętki ,
chrost-krzak
Tóż miyjce sie wszedcy dobrze i wiesiołego popióntku
Dodaj komentarz