CO TYDZIYŃ PO NASZYMU: Szkryfać kómusi po ścianie to ni ma pieknie

Możne, że eszcze kiejsi podarzi sie mi spozdrzić jakisi szure strómki, taki jak ciepły mi sie na łoczy zeszły tydziń, ale dzisio zadzierżymy sie przi ulice dra Kluckigo na kierej wubec żodnych stromków ni ma. Tak rozmyślóm skyrs czymu takóm nie pieknóm ulicem podarowali burmistrzowi, kiery w dewatnostym wieku łostudził sie aże jedynos roków s tustelokami. Tela przeca je inszych pieknych ulic w naszym meście i trzeja było to kapke inakszyj zarzóndzić, coby usznować zasłóżonego człowieka. Kiery i jak downo na to prziszeł tego nie wiym, ale tabulka na kierej widać miano dra Kluckigo je uż lekuśko przirdzewiało i mo na zicher s pińdziesiónt roków. Nie widać też, coby kierysi mioł we starości ściany łod tych wszeckich chałup kiere tam stojóm, bo uż chybiło placu na szkryfani po nich. Dzisio mało tam tyndy chodzóm tustelocy, bo wiyncyj je na ni schódków niż rownej cesty i też tymu wszedcy kierzi szanujóm swoji klepeta drepszóm naobkoło. Kiejsi eszcze chodzowało sie tam tyndy do kartóniarzi, ale uż przeszło dwacet roków tymu to zawrzili, bo isto delij nie pasowały żodnymu ty papindeklowe pudliczka i kiśniczki jaki robili tam za socjalizmu. Dzisio yny pzidajne zustaly tam ściany, po kierych gdo mo kapke farby i chynci to może szkryfać wszecko co mu yno przidzie do czepani. Aż dziw biere, że eszcze żodyn na to nie prziszeł, coby kludzić tam lufciorzy i ukazować im tyn nejnowszy trynd sztuki graficznej miasta Cieszyna. A łoglóndać je co, bo gdosi tam nie żałowoł se żodnej farby i szmyry na pucu sóm czorne, czyrwióne, biołe, a na jednej ścianie, kierysi namolowoł aji rozmajte kwiotka.

Mini słownik:
kiejsi-kiedyś,
spozdrzić-zobaczyć,
strómki-drzewka,
zadzierżeć- zatrzymać,
skyrs-dlaczego,
łostudził-kłopocił,
kapke-trochę
na zicher- na pewno,
chybiło-zabrakło,
kiśniczka-pudełko,
papindekiel-karton,
przidajny-potrzebny,
szkryfać-bazgrać,
czepań- głowa,
lufciorz- turysta,
szmyra-smuga,
puc-tynk,

Tóż miyjcie sie wszedcy dobrze i wiesiołego popióntku