CO TYDZIYŃ PO NASZYMU: Zaś idzie bez łostudy wlazować do Czech

Przeca uż sie podarziło Czechóm te granice odewrzić, bo wszedcy jejich ”obczanie” uż przedrobiali nogami, coby naszczywić nasze wszecki kszefty. Uż na drugi dziyń jak to rukło, to dało sie zaroz uwidzieć mjynij placu przi wszeckich naszych kszeftach. Możne skyrs tego ty małe kszefty na Głymboki sie obstojóm i zaś bydzie tak jak kiejsi. Chocioż gdo wiy, bo przez tych porem miesiyncy jak ta granica była zawrzito, to łóni robili”nakup” we swojich kszeftach i majóm isto pełne szranki rozmajtych wiecy. Dzisio isto bydzie mioł u nas wziyńci rozmajty wórszt, a ku tymu inszo leberka, abo aji łowiynzina. Nie wiym skyrs czymu tym naszym bracióm Czechóm to rozmajte nasze miynso tak szmakuje, ale isto jejich babucie i cało gowiydź je czymsi inszym futrowano. To samo je też ze wszeckimi ździorbami kiere kupowane sóm przez nich w Castoramie, bo isto aji nasze banty, papioki i szrubki robióne sóm s inszego zielaza. Możne, że to je prowda i taki nasze szrubki lekciyj wlazujóm do czeskigo drzewa. Dobrze, że eszcze nie chodzóm do naszych dochtorów, bo to dziepro, by była łostuda s kieróm nie szło by se isto dać rady. Nie wiym yno czy strzigajóm sie też jejich chłopi u nas, a czeski paniczki dajóm se robić na głowach waserwele. Moc wiecy jednakowóż u nas zdrożało i nie bydzie isto na nich takigo wziyńcio jako kiejsi. Tak rozmyślóm, kiedy przidzie zaś taki czas i sie to zwyrtnie, coby tak jak downij za socjalizmu klupać do jejich obchodów i sie dowiedzieć, że nabydka dne, to je dnes- polsko łowiynzina i polski kwit.

Mini słownik:podarziło - udało się,   dewrzić - otworzyć,   obczanie - obywatele,   nawszczywić - odwiedzić,   kszefty - sklepy,   rukło - uderzyło,   skyrs - z powodu,   kiejsi - kiedyś,   zawrzito - zamknięta,   szranki - komody,   wiecy - rzeczy,  wórszt - kiełbasa,   leberka - pasztetowa,   łowiynzina - wołowe,   babuć - wieprz,   gowiydź - drób, utrowano - karmiona, ździorba -  niepotrzebne rzeczy,   banty - zawiasy,   wlazujóm - wchodzą,   waserwele - wodna ondulacja,   zwyrtnie - obróci się,   klupać - pukać,  nabydka dne to je dnes - oferta dnia, to jest dzisiaj, kwit - gorzała.

Tóż miyjcie sie wszedcy dobrze i wisiołego popióntku!