CO TYDZIYŃ PO NASZYMU: Kiery eszcze dzisio wiy co to je kosok i do czego łón je

”...upłakowali na ni rechtorzi...”. fot. FJD

”...jedyn taki zogródek...". fot. FJD

”...dostały swoji cojgnisty”. fot. FJD

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Swoji cojgnisty

Dzisio zaś bydzie wszeckigo po kapce, skyrs tego, że fórt żodnych hałdamaszy ni ma w naszym mieście. Fórt yny wszedcy mamrzóm na tóm zawrzitóm granice i gdo yno może to przichodzi na most, coby chocioż podziwać sie na tóm czeskóm budke s tym modrym dachym, kole kierej fórt soji tyn sóm haziel. We sztwortek upłakowali na nim rechtorzi z Cieszyńskigo Ślońskigo Uniwersytetu, a w pióntek zegnane tam zustały dziecka ze szkoły powszechnej, kiere zamias we szkole tam na tym moście dastały swoji cojnisty. Ni mogym prziś na to, skyrs czymu fórt pokazjymy tym naszym bracióm Czechóm, że bez nich ni mogomy żyć ? Zdowało sie eszcze tak nie downo, że łóni też nas majóm fest radzi, a szpecyjalnie ty nasze wszecki kszefty. Ale łóni jakosi na tyn most nie przichodzóm i nie widać, coby im bez nas było luto. Sie mi zdo, ze uż moc ludzi łod nich łodwykło, a sóm aji tacy co se to chwolóm, bo dzisio idzie normalnie bez wypuczu zozdrzić do każdego kszeftu. Jo zaś zozdrził na rynek, kaj stojóm ty niewydarzóne betónowe kryngi wrażóne do drzewianych corków i dzisio widać, że rotuzowi ło nich jakosi przepómnieli. Eszcze porem tydni tymu wedla tych niewydarzónych strómków uwidzieć szło piekne kwiotki, a dziso uż tam je yno trowa. Isto wysiyc jóm je ciynżko, bo kosoki uż wyszły s mody, a maszyna do sieczynio żodno tam isto nie wlezie. Zrobiło sie też kapke cieplij i gdo yno może stawio wedla swoji gospody zogródki. Jydyn taki zogródek kierysi tak postawił przi ulice Kuminiorski, że ani kolem niego przeciś sie nie idzie.

Mini słownik: po kapce - po trosze, fórt - ciągle, hałdamasz - zabawa, mamrzóm - marudzą, haziel - ustęp, rechtorzi - profesorowie, cojgnist - świadectwo, skyrs - dlaczego, fest radzi - mocno kochają, kszefty - sklepy, było luto - było przykro, bez wypuczu - bez ścisku, zozdrzić - zobaczyć, kaj - gdzie, corek - drewniana obudowa, wedla - obok, kosok - sierp, zogródek - ogródek, przeciś - przepchnąć.

Tóż mjyjcie sie wszedcy dobrze i wiesiołego popióntku