CO TYDZIYŃ PO NASZYMU: Haziel, to je moc przidajno wiec

”...stawiajóm uż we dwóch rajach...”. fot. FJD

Fórt ni mogymy sie strzepnóć łod tego koronawirusa, skyrs tego, bo jakosi każdy je inakszyj wylynkany. Czesi dejmy na to, zawrzili nóm granice, bo sie wylynkali hawiyrzi, kierzi ferdujóm w ślóńskich kopalniach. Przibrali też tusteloków do tej spółki, chocioż sóm łóni bogu ducha winni i nic na to nie idzie poradzić. Za mostym postawili jakómsi bude s modrym dachym, pod kierym roz stoji, a po drugi siedzi czeski wojok. Zaroz wedla ni, postawili se taki nowoczesny haziel, na kiery dzisio wszedcy prawióm toj-toj. Taki haziel je bardzo porynczny dlo tych, kierzi majóm słaby zdziyrż, bo nie muszóm za potrzebóm nigdzi daleko gónić. Kapke jednaowóż ni ma to za elegancki, że tyn haziel stoji wedla tej budy i to eszcze na prociw polski stróny. Możne, że rozchodzi sie naszym sómsiadóm ło to, coby go wszedcy widzili i jak kogo ścignie to dostanie łod nich powolyni, coby sie w nim z darma rozczapić. Dobrze że eszcze łod niego nie odjyli dwiyrek i chocioż tela je to dobre, że nie bydymy musieli łoglóndać czeskigo wojoka jak sie w tym haźlu załatwio. Inszo ochróna przed tym wirusym, kiero ciepła mi sie na łoczy, to postawiyni swojigo auciska przed chałupóm w kierej urzyndujóm miastowi wachtyrze. Ci, co ty auta tam stawiajóm uż we dwóch rajach, isto se rozmyślajóm, że miastowi wachtyrze poradzóm odganiać tego wirusa, a ku tymu nie trzeja bydzie za to płacić. Rozmajcie też je w urzyndach, bo tejmy na to w takim becyrku idzie uż wlyź do każdego biura, a kaj indzij trzeja czakać, aż urzyndnik sóm ku nóm przidzie.

Mini słownik: fórt - ciągle, skyrs - z powodu, wylynkany - wystraszony, zawrzili - zamknęli, hawiyrz - górnik, buda - barak, modry - granatowy, wedla - obok, haziel - ustęp, słaby zdziyrż - słabe trzymanie, kapke - trochę, na prociw - na przeciw, dwiyrka - drzwiczki, rozczapić - kucnąć, ciepła - rzuciła, wachtyrz - strażnik, becyrk - powiat, wlyź - wejść, kaj - gdzie.

Tóż mjyjcie sie wszedcy dobrze i wiesiołego popióntku