CO TYDZIYŃ PO NASZYMU: Za winklym

"Do zogródki przi szrócie". fot. Ewelina Szuścik

"...za winklym do prawa...". fot. Ewelina Szuścik

Szpacyrkym po dziedzinie

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydze rozumioł
to jyny wiater bydzie po naszymu szumioł"

Do zogródki przi szrócie

W zeszłym miesióncu szpacyrowalimy kole "Stodoły", tuż dzisio poszolóntómy sie uzaś kónsek dalij. Za winklym do prawa przi ceście, pod brzimym sóm dwa szumne papyndekle. Jedyn, taki czyrwióny namowio nas, coby sprzedać zieleźne ździorba bo tam nóm nejlepij zapłacóm, a drugi zielóny chwoli sie, że jak pójdziesz za strzałkóm to dostaniesz wszecko do zogródki i domowej gowiydzi. Aji gołymbiorze tam chodzójóm, kie im sie skóńczy futer dlo ptoków. Skuli tego czyrwiónego chwolidła tak mie wziyno na ckliwote i żech se wszymła na wiela wiecy ganc zaimawych, kiere sóm tam pochynióne. Baji taki bicygle, kie yny cosi kansi puści abo rdzawica zeżro rame,tak żodnymu nie worce to sprawować, yny nejlepij sprzedać na szrót. Dzisio wszeckigo mómy za moc, aji w kómputrze nóndziesz, że gdosi do zdarma ganc dobre, plaskate pudło yny skyrs tego, że tyn gdosi se kupił nowsze bardzij zaimawe. Kapke mie to nasrowo, bo może eszcze być tak, że ludzióm - ludzie nie bydóm zocni i bydóm se baby - chłopów wymiyniać, a chłopy - baby i bydzie s tego łokropny hałdamasz. Kie by tak zaglóndyć do zogródki przi szrocie, to kole krzoków, flancków i gojiczków majóm tam też roztomajte żrani dlo świń. Kiery by tymu kiesi doł wiare, że świnie bydóm musiały dostować cyganióne żrani coby mógły wartko urosnyć? Isto żodyn! Dzisio sie chowie świnie na miynso, tak coby fest masno nie była, a kiesi starka mierziła chłost świni i prawiła, że jak bydzie chróby na dwa palce tak szpyrki bydzie moc. Zmiyniajóm sie czasy i ludzie też sie zmiyniajóm, yny coby im s tego mało - masnego miynsa oleju w łepetynie nie brakło, kie im do czerepa przidzie starzików oddać na szrót!

Mini słownik:

brzim - modrzew

czyrwióny - czerwony

zogródka - ogródek

gowiydź - ptactwo domowe

gołymbiorze - hodowcy gołębi

chwolidło - reklama

ckliwota - przykro, smutno

wiece - rzeczy

ganc - całkiem

zaimawych - fajnych,ciekawych (w tym przypadku - nie popsutych)

bicygle - rowery

rdzawica - rdza

gdosi - ktoś

zdarma - za darmo

plaskate pudło - telewizor

nasrowo - denerwuje

hałdamasz - rozgardiasz, bałagan

flancki - sadzonki

gojiczki - choinki

chróby - gruby

czerep - głowa

Miyjcie sie wszedcy dobrze i wiesiołego popióntku!

Dzisiejszy tekst ma tytuł: "Do zogródki przi szrócie".