CO TYDZIYŃ PO NASZYMU: Siednóć se przi piwie ”Pod Dębem”

"...wielki szyld”Centrum Rozrywki”...”. fot. FJD

”Nie zawrzito zustała jednakowóż gospoda “Pod Dębem”...". fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

Małoś niewiela robił

Eszcze dzisio trzeja dopowiedzieć ło tym,że tyn werk s kierego dzisio kierysi zrobił plac do zbiyranio starych zielaznych ździorbów kiejsi bardzo pieknie “Lasym” sie mianowoł. Co po nim zustało to sie to połoglóndejcie jak pujdziedzie na szpacyr do gospody “Pod Dęba”. S tego downego miana zustało yno to, że faktycznie zarośnie to uż niedłógo lasym i możne,że zaś spadki Cieszyniocy to bydóm mianować tak jak downij. Przi tym też żech se spómnioł, że eszcze dwa miesiónce tymu cały Cieszyn był łoblepióny łobroskami tego panoczka, kiery jak Cieszyniocy prawióm małóś niewiela robił coby ty nasze werki opatrować. Było tych łobrosków tela, że stykło by ich na wszecki werki, kiere zustały w Cieszynie zawrzite i to eszce na wszecki ściany. Nie zawrzito jednakowóż zustała gospoda “Pod Dębem” i ku tymu eszcze kierysi bardzo pieknie jóm wyrychtowoł coby ludziska mieli kaj spóminać przi piwie stare dobre czasy. Nie wiym czymu ze stróny starej kryngielni kierysi wywiesił wielki szyld ”Centrum Rozrywki” i zapómnioł napisać ło jakóm genał rozrywke sie rozchodzi. Przeca tyn bilard i rzutki kiere tam sóm nimogóm przeca być tym całym centrum uciechy w Cieszynie, bo isto ci co to wywiesili mieli pietra napisać całom prowde ło tej rozrywce. Je teraz tako moda coby każdy nejmiynszy kszeft mianować salónami, cyntrami, marketami i eszcze wszeckim tym co ludzióm przidzie do czepani,zamias normalnie po naszymu abo możne aji po polsku zmianować. Jak tak dalij pudzie to nasz Rynek bydzie sie mianowoł szpacyrowym cyntrum a Głymboko wielkóm szpacyrowóm hanlowo - usługowóm promenadóm, kiero za skryntym zakludzi nas do nejwiynkszej republiki w Europie.

Mini słownik:

werk - zakład,

kierysi - ktoś,

ździorba - graty,

spadki - z powrotem,

mianować - nazywać,

mołoś niewiela - malutko,

genał - całkiem,

kszeft - interes,

czepań - głowa,

skrynt - zakręt.

Miyjcie sie wszedcy dobrze i wiesiołego popióntku!

Dzisiejszy tekst ma tytuł "Małoś niewiela robił"