CO TYDZIYŃ PO NASZYMU: Kiery tyn potók kole targu Sarkandrym smianowoł?

”Skónd sie to miano wziyło...”. fot. FJD

”...chwolidło ze sztyróma gwaiazdkami...”. fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

Przeszła ryma

Szpacyrować po tej Stawowej to ci je naprowde uciecha, bo kaj sie yno człowiek obróci to uwidzi cosi fest zaimawego. Dejmy na to przed tym placym przi tej pochyniónej Termice je taki maluśki chwolidło ze sztyróma gwiazkami kansi aże s Wiseł łod hotelu Jawornik. Kiery na to prziszeł to musi być isto jakimsi geniuszym łod reklamy, bo se isto porozmyśloł, że te szuro powieszónóm maluśkóm tabulke wszedcy co tam przidóm zaroz uwidzóm. Zaś kapke głymbij w placu na ścianie mogymy uwidzieć niemożliwe dlo mie cygaństwo, że dziynnie majóm nowy towor. Możne, że po jejimu nowy to nima inszy yno tyn sóm ale wysmyczóny prawie dzisio s pod lady co eszcze sie wczora na ni nie naszeł. A że to je tyn sóm muster to isto żodnymu nie wadzi, bo jak łón je dzisio piyrszy roz na wyrchu to je to nowy towor i fertig. Jak pokroczymy kapke dalij to ciepnie sie nóm na łoczy tabulka s kierej sie dowiymy, że wedla nas rzynie woda w potoku kiery sie mianuje Sarkander. Skónd sie to miano wziyło żodym nie umioł mi wyoślić, bo przeca tyn św. Jónek Sarkander rodził sie we Skoczowie a umrził w Olomołcu i s Cieszynym ni mioł nic społecznego. Muszymy tyn temat jednakowóż poniechać, bo możne jak by sie ludziska ło tym zwiedzieli, że mómy w Cieszynie taki potók ,kiery mo miano łod świyntego to hónym by całóm wode ś niego wyduldali. A nie dej Boże jak by tak kómósi po wypiciu tej wody przeszła ryma abo naroz plynskiyrz sie fajnie ze szłapy odmoczył to by nas tu cało Polska najechała i zaroz brakło by w nim wody a przi tym możne, że aji by sie Olza nie obstoła. Moc je takich ludzi na świecie, że wierzom w to co chcóm i żódyn im nie poradzi tego przemówić.

Mini słownik:

kaj - gdzie,

uwidzi - zobaczy,

zaimawy - ciekawy,

pochyniónej - porzuconej,

chwolidło - reklama,

kansi - gdzieś,

szuro - krzywo,

kapke - trochę,

wysmyczóny - wyciągnięty,

muster - wzór,

fertig - gotowy,

wedla - obok,

umrził - umarł,

nic społecznego - nic wspólnego,

hónym - prędko,

wyduldać - wypić,

ryma - katar,

plynskiyrz - odcisk,

tego przemówić - tego wytłumaczyć,

nie obstoła - nie uratowała.

Miyjcie sie wszedcy dobrze i wiesiołego popióntku!

Dzisiejszy tekst ma tytuł "Przeszła ryma"