CO TYDZIYŃ PO NASZYMU: Czeszczina to je dlo nas srandowno wiec

”Uż na samym kraju je taki misz masz...”. fot. FJD

”...stoji nie obalóno ”Termika”...". fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

Sóm pisane tuplowanie

Do Puńcowa uż dalij nie pujdymy, bo to je inkszo gmina a jo móm yno zwól szpacyrować po Cieszynie. Puńcowiokóm isto lepszyj, by było przinależeć do Cieszyna choćby skyrs tego coby mieć wszecki urzyndy na pozoryndziu. Nic na to nie poradzymy i trzeja mi sie przekludzić na drugóm stróne Cieszyna, tam kaj kiejsi były stawy. Moc tusteloków isto eszcze pamiynto, że taki ulice nie było i tam kaj dzisio je tyn chiński kszeft były stawy. Tak isto wszedcy uż prziszli na to, że bydymy dzisio szpacyrować po Stawowej, kiero tam na wyrchu je przirażóno do ulicy Biylski. Ta Stawowo isto dzierży rekrd Cieszyna jak by prziszło porachować wszecki chwolidła kiere tam sóm. Uż na samym kraju je taki misz masz, że zaroz was głowa rozboli jak to poczytocie. Je tam chwolidło kiere nas namowio do kupiynio se jakisi tańszej kasy, ale jak jóm kupiymy do dwacatego piyrszego marca tego roku. Nie wiym jako łóni se to myślóm s tym łacnym przedowanim jak uż mómy siyrpiyń, a tam fórt to wisi. Niżyj je “Żabka” kaj nad jeji dwiyrzami ciepnie sie nóm na łoczy pisane s małej litery słowo ”alkohol” bez żodnego wyłoślynio czy to sie rozchodzi ło kwit, wino czy piwo. Zaś zaroz wedla kierysi chce nóm przedać kostkem brukowóm a przi tym rozmajte komputry i ku tymu aji internet. I powiydzcie czy to nima misz masz? Zaś na prociw eszcze stoji nie obalóno “Termika” w kierej znaszły se plac przerozmajte kszefty. I uzaś bydóm mieli ludzie przileżytoś zachycić cosi s czeskigo,kierzi to majóm bardziyj po rynce. Wszecki szyldy sóm tam pisane tuplowanie i żodyn nie bydzie mioł łostudy coby zachycić dejmy na to co to je levne zbożi,odevy i eszcze moc inszych czeskich ausdruków.

Mini słownik:

inkszo - inna,

skyrs - z powodu,

przekludzić - przeprowadzić,

kaj - gdzie,

kszeft - interes,

przirażóno - połączona,

chwolidło - reklama,

łacne - tanie,

fórt - ciągle,

ciepnie - rzuci,

kwi - wódka,

wedla - obok,

obalóno - przewrócona,

przileżytoś - sposobność,

tuplowanie - podwójnie,

łostuda - kłopot.

Miyjcie sie wszedcy dobrze i wiesiołego popióntku!

Dzisiejszy tekst ma tytuł "Sóm pisane tuplowanie"