CO TYDZIYŃ PO NASZYMU: Sztrof idzie chycić łod miastowego wachtyrza za bele co

Zdjęcia F.J. Dral

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

W zeszłym tydniu skóńczylimy na tym graniu w zogródku ze zadku Domu Narodowego, ale przepómniołech napisać, że w lecie inksze grajki rzympolóm w Cieszynie kaj sie yno do. Jedni grajóm ganc bolawie i rachujóm yno na to, że sóm cieszyńskim folklorym i letnikorze cosi ciepnóm im do kaszkieta, abo do szolki. Sóm też tacy co grajóm pieknie, ale coby kierysi ku nim prziszeł muszóm grać na cały regulator, coby w hóślach aże struny popraskały. Zaś ci, co grajóm na kneflówkach abo na trómpetach poradzóm ganc lekuśko do nich duchać, a i tak słyszani sóm w całym mieście.Tacy jednakowóż muszóm mieć na to grani powolyni s rotuza, abo łod urzyndników kierzi majóm we starości cesty. Rozchodzi sie ło to, że byle kiery bez powolynio nie śmiy se na ceście stanóć i grać, bo wedla przepisu bydzie inkszym zawadzoł. Miastowi wachtyrze yno na to czakajóm i bruszóm blajsztyfty coby takim grajkóm bez powolynio uwalić sztrof. Cosi sie też porobiło s tustelokami, bo nima tych zogródków tak moc jak było łóńskigo roku. Abo kszefciorze zbiydnieli, abo swóniali jakisi inkszy interes i dzisio skyrs tego uż nima tam tela piwa jako było kiejsi. S pod laubów straciły sie też wszecki chwolidła co wisiały u wyrchu i wystawiane sóm yny tabule s jedzynim i s totolotkym. Na winklu s Głymbokóm był kiejsi bar "Co nie co" w kierym szło wciepnóć cosi na ruszta, ale dzisio ciszyniocy sfajnieli i je tam przedowano czekulada. Ale czymu tyn kszeft mianuje sie Mont Blanc na kierym na iste ani kawa ani kakao nie rośnie tego nie wiym. To miano nie pasuje też ani do zwyżki, kiero w Cieszynie je prawie ło sztyry a pół tysiónca metrów miynszo łod tej hroznej gory.

Mini słownik:

kaj-gdzie,
letnikorz-wczasowicz,
hóśle-skrzypce,
kneflówka-harmonia,
cesta-droga,
wedla-obok,
wachtyrz-strażnik,
brusić-ostrzyć,
blajsztyft-ołówek,
skyrs-z powodu,
zwyżka-wysokość,
lauby-podcienie

Tóż miyjcie sie wszedcy dobrze i wiesiołego popióntku.

Dzisiejszy felieton ma tytuł "Na kneflówkach"