CO TYDZIYŃ PO NASZYMU: Dzisio państwowo posada to ni ma nic istegoPOZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym. Nasz rynek je doś wielki i przez tych piyńć roków rozmajtych cudów sie tu namnożyło. Sóm też taki co sie dłógo nie obstoły, bo nowej władzy i tustelokóm sie nie spodobały. Ta tramwajowo sztreka o kierej żech łostatnio pisoł mo wiyncyj szczynśćio, bo je ponad polityczno i s tej ziymi isto nigdy żodyn ji nie wyszkubie. Chocioż dzisio je taki zwyk, coby nie prawić żodnymu nigdy, bo jutro możne duchnie inkszy polityczny wiater i uż bydymy w rzici. Tak sie przeca stało s tymi biołymi sztrajfkami na prociw Dómu Narodowego, kiere prawiły nóm kaj idzie se postawić auto jak mómy przileżytoś cosi se na rynku obsztelować. Jacysi macherzi zababrali ty sztrajfki szaróm farbóm, bo isto było to tańsze jak dropani drócianymi kartaczami tej biołej farby. Dziynka tymu zrobił sie plac na poskryncany s zieleźnych rułek gesztel łobcióngnióny czornóm płachtóm, po kierym za gołymbiami gónióm małe dziecka. W Domu Narodowym też sie za tych miniónych roków moc pozmiyniało, ale nejważniejsze to je isto to, że uż je tam trzeci dyrektor. Piyrsze tam był panoczek, a po nim prziszła tako paniczka s ćmawymi włosami, a dzisio w tym Domu Narodowym urzynduje eszcze inkszo dyrektorka. Co tam sie eszcze pomiyniało tego nie wiym, bo wszecki izby majóm ty same dwiyrze chocioż na nikierych sóm inksze miana. Na dole kiejsi był bardzo piekny bar "Angora", kiery zusoł tam stela wyciepany, bo isto nie pasowoł do nowej linije kultury. Zaś ganc ze zadku za chałupóm tyn kónszczek gróntu zustoł zmianowany "Kulturalnym Ogródkiem" w kierym rozmajci muzykańci mogóm se pograć na czym yno chcóm, a ludzie, kierzi tam przidóm mogóm s darma ich posłóchać. Mini słownik: obstoły-uchowały, Tóż miyjcie sie wszedcy dobrze i wiesiołego popióntku! Dzisiejszy tekst ma tytuł "Nie wyszkubie".
|
reklama
|
Dodaj komentarz